Молитва святым мученицам
Вере, Надежде, Любови
и матери их Софии

Тропарь, глас 4-й

Торжеству́ет Це́рковь перворо́дных, и свесели́тся, прие́мля ма́терь, о ча́дех веселя́щуюся, я́же я́ко му́дрости тезоимени́тая, тро́йственным богосло́вским доброде́телем равночи́сленныя породи́. Ты́я с му́дрыми де́вами зрит уневе́стившияся Жениху́ Бо́гу Сло́ву. С не́ю и мы духо́вне в па́мяти их свесели́мся, глаго́люще: Тро́ицы побо́рницы, Ве́ро, Любве́ и Наде́ждо, в ве́ре, любви́ и наде́жде утвержда́йте нас.

Кондак, глас 1-й

Софи́и честны́я свяще́ннейшия ве́тви, Ве́ра и Наде́жда и Любо́вь, показа́вшеся, му́дрость обуи́ша е́ллинскую благода́тию, и пострада́вше, и победоно́сицы яви́вшеся, венце́м нетле́нным от всех Влады́ки Христа́ увязо́шася.

Молитва 1-я

О святы́я и достохва́льныя му́ченицы Ве́ро, Наде́ждо и Любы́, и до́блестных дще́рей му́драя ма́ти Софи́е! К вам ны́не со усе́рдною моли́твою притека́ем. Что бо па́че возмо́жет предста́тельствовати за ны пред Го́сподем, а́ще не ве́ра, наде́жда и любы́, три сия́ доброде́тели пребыва́ющия, во и́хже о́браз нарече́нныя, са́мою ве́щию о́ныя яви́сте? Умоли́те у́бо Го́спода, да в ско́рбех и напа́стех неизрече́нною благода́тию Свое́ю покры́ет ны, и сохрани́т, и Того́ сла́ву, я́ко со́лнце незаходи́мое, зре́ти да сподо́бит. Споспе́шествуйте нам во смире́нных моле́ниих на́ших, да прости́т Госпо́дь Бог грехи́ и беззако́ния на́ша, и да поми́лует нас, гре́шных, и щедро́т Свои́х да сподо́бит нас Христо́с Бог, Ему́же сла́ву возсыла́ем, со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Молитва 2-я

О, святы́я му́ченицы Ве́ро, Наде́ждо и Любы́, и му́драя ма́ти Софи́е! К вам ны́не со усе́рдною моли́твою притека́ем. Умоли́те у́бо Го́спода, да в ско́рбех и напа́стех неизрече́нною благода́тию Свое́ю покры́ет ны, раб Свои́х (имена), и сохрани́т, и Того́ сла́ву, я́ко со́лнце незаходи́мое, зре́ти да сподо́бит. Споспешеству́йте нам во смире́нных моле́ниих на́ших, да прости́т Госпо́дь Бог грехи́ и беззако́ния на́ша и да поми́лует нас, гре́шных, и щедро́т Свои́х да сподо́бит нас Христо́с Бог, Ему́же сла́ву возсыла́ем, со Безнача́льным Его́ Отце́м, и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в.

Величание

Велича́ем вас, страстоте́рпицы святы́я, и чтим честна́я страда́ния ва́ша, я́же за Христа́ претерпе́ли есте́.