Молитва перед иконой Божией Матери «София — Премудрость Божия»

Тропарь, глас 4-й

Ве́лия и неизрече́нная Прему́дрости Бо́жия, си́ла смотре́ния плотска́го та́инства! Софи́е Преимени́тая, де́вственных ду́ше и неизглаго́ланнаго де́вства чистото́, смире́нныя му́дрости и́стино, поко́ище Свята́го Ду́ха, пречестны́й хра́ме непостижи́мыя сла́вы Его́, огнезра́чный престо́ле Христа́ Бо́га на́шего, в Тя бо всели́ся неизрече́нно Сло́во Бо́жие, и плоть бысть, Неви́димый яви́ся, и неприкоснове́нный из Тебе́ изы́де, и с челове́ком поживе́, врага́ иско́ннаго уловля́я и челове́ки от кля́твы дре́вния свобожда́я, возводя́ па́ки, отню́дуже испадо́хом. Мо́лим ти ся, Влады́чице, отягче́нныя ны во гресе́х лю́тых, поми́ловати и спасти́ ду́ши на́ша, и, я́ко человеколюби́вая и милосе́рдая Цари́ца, Ма́ти Прему́дрости Бо́жия Сло́ва, при́зри на ны, гре́шныя лю́ди Твоя́, и умилосе́рдися, заступи́ от напа́стей и скорбе́й лю́тых и гра́ды на́ша невреди́мы сохрани́, иде́же ны́не и́мя Твое́ пресвято́е боголе́пно сла́вится.

Кондак, глас 8-й

Притеце́м, лю́дие, к чудотво́рному о́бразу Прему́дрости Бо́жия, Цари́цы и Богоро́дицы: Царя́ Небе́снаго Ма́ти, Христа́ Бо́га на́шего, услы́ши нас, гре́шных и недосто́йных раб Твои́х, в час сей припа́дающих и моля́щихся с воздыха́нием и слеза́ми, уми́льно глаго́лющих и приле́жно вопию́щих: от бед изба́ви нас, Влады́чице, и заступи́, и не пре́зри воздыха́ния на́шего и слез, и изми́ нас от вся́кия ско́рби и напа́сти, я́ко мо́жеши, хотя́щи, ра́зве Тебе́ Предста́тельницы ины́я и хода́тая те́пла не и́мамы к Сы́ну Твоему́ и Бо́гу на́шему, да спасе́т Тебе́ ра́ди ду́ши на́ша.

Величание

Велича́ем Тя, Пресвята́я Де́во, Богоизбра́нная Отрокови́це, и чтим о́браз Твой святы́й, и́мже то́чиши исцеле́ния всем, с ве́рою притека́ющим.