Молитва святой великомученице Варваре

Тропарь, глас 8-й

Варва́ру святу́ю почти́м: вра́жия бо се́ти сокруши́ и, я́ко пти́ца, изба́вися от них, по́мощию и ору́жием креста́, всечестна́я.

Кондак, глас 4-й

В Тро́ице благоче́стно пева́емому после́довавши Бо́гу, страстоте́рпице, и́дольская притупи́ла еси́ чти́лища; посреде́ же по́двига страда́льчествующи, Варва́ро, мучи́телей преще́ния не устраши́лася еси́, мужему́дренная, велегла́сно пою́щи при́сно: Тро́ицу чту, Еди́но Божество́.

Молитва 1-я
(перед мощами)

Свята́я сла́вная и всехва́льная великому́ченице Христо́ва Варва́ро! Со́браннии днесь во хра́ме твое́м Боже́ственнем лю́дие, ра́це моще́й твои́х покланя́ющеся и любо́вию целу́юще, страда́ния твоя́ му́ченическая, и в них Сама́го Страстополо́жника Христа́ похвала́ми ублажа́ем, и тебе́, изве́стная жела́ния на́шего хода́таице, мо́лим: моли́ с на́ми и о нас, умоля́емаго от Своего́ милосе́рдия Бо́га, да ми́лостивно услы́шит нас, прося́щих Его́ благосты́ню, и не отста́вит от нас вся ко спасе́нию и житию́ ну́жная проше́ния, христиа́нскую же кончи́ну жития́ на́шего безболе́зненну, непосты́дну, ми́рну и Боже́ственных Та́ин прича́стну да да́рует, и всем на вся́ком ме́сте, во вся́кой ско́рби и обстоя́нии, тре́бующим Его́ человеколю́бия и по́мощи, вели́кую Свою́ пода́ст ми́лость, да благода́тию Бо́жиею и твои́м те́плым предста́тельством, душе́ю и те́лом всегда́ здра́ви пребыва́юще, сла́вим ди́внаго во святы́х Свои́х Бо́га Изра́илева, не удаля́ющаго по́мощи Своея́ от нас, всегда́, ны́не и при́сно, и во ве́ки веко́в. Ами́нь.

Молитва 2-я
(перед иконой)

Свята́я сла́вная и всехва́льная великому́ченице Христо́ва Варва́ро! Собра́ннии днесь лю́дие и пред ико́ной твое́й усе́рдно моля́щиися, страда́ния же твоя́ му́ченическая и в них Сама́го Страстополо́жника Христа́, да́вшаго тебе́, не то́чию е́же в Него́ ве́ровати, но и е́же по Нем страда́ти, похвала́ми ублажа́юще, мо́лим тя, изве́стная жела́ния на́шего хода́таице: моли́ с на́ми и о нас умоля́емаго от Своего́ благоутро́бия Бо́га, да ми́лостивно услы́шит нас, прося́щих Его́ благосты́ню, и не отста́вит от нас вся ко спасе́нию и житию́ ну́ждная проше́ния, и да́рует христиа́нскую кончи́ну животу́ на́шему, безболе́зненну, непосты́дну, ми́рну, Боже́ственных Та́ин прича́стну, и всем, на вся́цем ме́сте, во вся́цей ско́рби и обстоя́нии, тре́бующим Его́ человеколю́бия и по́мощи, вели́кую Свою́ пода́ст ми́лость, да благода́тию Бо́жиею и твои́м те́плым предста́тельством, душе́ю и те́лом всегда́ здра́вии пребыва́юще, сла́вим ди́внаго во святы́х Свои́х Бо́га Изра́илева, не удаля́ющаго по́мощи Своея́ от нас, всегда́, ны́не и при́сно и во ве́ки веко́в. Ами́нь.

Молитва 3-я

К тебе́, я́ко ко и́стинному ско́раго исцеле́ния и многочу́днаго врачева́ния исто́чнику, свята́я де́во Варва́ро великому́ченице, аз немощны́й прибега́ю и пред твое́й свято́й ико́ной усе́рдно молю́ся: виждь ра́ны грехо́вныя и всетеле́сную я́зву, виждь неможе́ние души́ моея́, и сие́, обы́чным твои́м милосе́рдием и бла́гостию понужда́ема, исцели́ти потщи́ся. Вонми́ гла́су моле́ния моего́, не пре́зри от окая́ннаго ми се́рдца приноси́мое стена́ние, и вопль мой услы́ши, я́ко ты еси́ мое́ прибе́жище. Святу́ю, Единосу́щную и Нераздели́мую Тро́ицу, Ю́же треми́ о́кнами в ба́не оте́ческой созда́нными изобрази́ла еси́, о мне, гре́шнем и нетерпели́вем рабе́ твое́м, моли́, да поми́лует мя ны́не и в день сме́рти моея́. Поклони́ся Отцу́ Небе́сному, да мя, все́ми грехми́ приклоне́ннаго и низу́ пове́рженнаго, воздви́гнет на славосло́вие Свое́, и устро́ит мя всегда́ горе́ име́ти се́рдце, го́рняя му́дрствовати, а не земна́я. Умоли́ Христа́, Сы́на Бо́жия, И́же моли́тву твою́ страда́льческую в темни́це услы́ша, да мя, лени́ваго к моли́твам и во уны́нии мно́зе, а́ки в темни́це, седя́ща, к ско́рому тече́нию путе́м за́поведей Бо́жиих наста́вит и пода́ст непреста́нно моли́тися усе́рдное хоте́ние. Призови́ и Ду́ха Свята́го, чистоты́ неизнуря́емаго исто́чника, в по́двизе страда́льческом тя, чи́стую де́ву, укрепля́ющаго и от стыда́ крыло́ма Свои́ма защища́ющего, я́ко да и мне, сту́дному и нечи́стому, се́рдце чи́сто сози́ждет и дух прав обнови́т во утро́бе мое́й, па́че же да призове́т мя и пода́ст усе́рдно подвиза́тися в житии́ чи́стом и укрепи́т мя на творе́ние благи́х дел. Ве́рую, я́ко вся сия́ мо́жеши мне, о свята́я великому́ченице Варва́ро, у Пресвяты́я Тро́ицы исхода́тайствовати, и а́ще восхо́щеши, си́льна еси́ помощи́ мне, я́ко просла́вившая Бо́га во удесе́х твои́х страда́льческих. И вем, де́во свята́я, я́ко ничто́же тебе́ невозмо́жно, то́кмо а́ще не пре́зреши слез и воздыха́ния моего́; сего́ ра́ди пред свято́й ико́ной твое́й молю́ся и тебе́, на небеси́ душе́ю пребыва́ющей, покланя́яся, дерза́ю моли́твенно глаго́лати: да бу́дут у́ши твои́ вне́млюще гла́су моли́твы моея́. Многострада́льное твое́ те́ло да уврачу́ет мно́гия души́ и те́ла моего́ стра́сти. Глава́ твоя́, мечу́ преклоне́нная, да даст главе́ мое́й во́ду чисти́тельную грехо́в. Власи́ твои́, неми́лостивно то́рганнии, да привя́жут мя к любви́ Бо́жией. Устне́ твои́ честни́и да заградя́т уста́ моя́ от праздносло́вия и отве́рзут всегда́ возвеща́ти хва́лу Госпо́дню. О́чи твои́, ви́дящии Свет Тро́ический, да у́зрят и мое́ во благи́х жела́ние, я́ко да бых и аз отвраща́л о́чи мои́, е́же не ви́дети суеты́, но всегда́ взира́л на блаже́нство небе́сное. Рука́ твоя́ отсече́на да удосто́ит мя всегда́ воздева́ти ру́це к Вы́шнему и не сплета́ти и́ми льще́ния. Сосца́ твоя́, неща́дно уре́занная, да бу́дут ми столп от лица́ вра́жия кре́пкий. Но́зи твои́, скороше́ствующии со све́тлою свеще́ю в черто́г Бо́жий к Жениху́ Небе́сному, да сотворя́т, я́ко да и аз нога́ма мои́ма ше́ствую ко вся́кому де́лу бла́гу, да бу́дет свети́льник нога́ма мои́ма зако́н Госпо́день и свет стезя́м мои́м. Ра́ны твоя́ от ран грехо́вных да свободя́т мя. Кровь твоя́, многокра́тне в муче́нии пролива́емая, да очи́стит ду́шу и те́ло мое́ от вся́кия скве́рны. Смерть твоя́ да не даст мне без испове́дания и покая́ния умре́ти, и́бо а́ще в ко́ем благоде́тельстве прославля́ема еси́, но в сем наипа́че, я́ко всяк, име́яй наде́жду на тя и вы́ну в по́мощь призыва́яй тя, от на́глыя избежи́т сме́рти, от нея́же и мене́ окая́ннаго изба́ви, де́во чи́стая, великому́ченице Варва́ро, и всемо́щными твои́ми моли́твами удосто́й мя одесну́ю Христа́ Сы́на Бо́жия ста́ти и слы́шати глас глаго́лющий: Благи́й ра́бе и ве́рный, вни́ди в ра́дость Го́спода твоего́. Ами́нь.