Молитва перед иконой Божией Матери «Ильинско-Черниговская»

Тропарь, глас 5-й

Пречи́стая Влады́чице Богоро́дице, упова́ние всех христиа́н, поне́же ина́го упова́ния не и́мамы, ра́зве Тебе́, Всенепоро́чная Влады́чице моя́, Госпоже́ Богоро́дице, Ма́ти Христа́ Бо́га моего́, те́мже поми́луй, и изба́ви мя от всех зол мои́х, и умоли́ ми́лостиваго Сы́на Своего́ и Бо́га моего́, да поми́лует окая́нную ду́шу мою́ и да изба́вит мя от ве́чныя му́ки и сподо́бит мя Ца́рствия Своего́.

Молитва

О, Пресвята́я Госпоже́, Влады́чице моя́ Богоро́дице, Небе́сная Цари́це! Спаси́ и поми́луй мя, гре́шнаго раба́ твоего́, от напра́сныя клеветы́, от вся́кия беды́ и напа́сти и внеза́пныя сме́рти. Поми́луй мя в дневны́х часе́х, и у́тренних, и вече́рних, и во вся́кое вре́мя сохрани́ мя: стоя́ща, седя́ща соблюди́, и на вся́ком пути́ ходя́ща, и в нощны́х часе́х спя́ща снабди́, покры́й и заступи́. Защити́ мя, Влады́чице Богоро́дице, от всех враг мои́х ви́димых и неви́димых и от вся́каго зла́го обстоя́ния. На вся́ком ме́сте и на вся́кое вре́мя бу́ди ми, Ма́ти Преблага́я, стена́ необори́мая и заступле́ние кре́пкое.

О, Пресвята́я Госпоже́, Влады́чице Де́во Богоро́дице! Приими́ недосто́йную моли́тву мою́, и сохрани́ мя от внеза́пныя сме́рти, и да́руй ми пре́жде конца́ покая́ние.

Пресвята́я Богоро́дице, спаси́ нас!

Ты мне Храни́тельница жи́зни всея́ яви́ся, Пречи́стая! Ты мене́ изба́ви от бесо́в в час сме́рти! Ты и по сме́рти мене́ упоко́й.

Под Твою́ ми́лость прибега́ем, Богоро́дице Де́во: моле́ний на́ших не пре́зри в ско́рбех, но от бед изба́ви нас, еди́на Чи́стая и Благослове́нная.

Пресвята́я Богоро́дице, спаси́ нас! Ами́нь.

Величание

Велича́ем Тя, Пресвята́я Де́во, Богоизбра́нная Отрокови́це, и чтим о́браз Твой святы́й, и́мже то́чиши исцеле́ния всем, с ве́рою притека́ющим.