Акафист
святому праведному Иоанну
Кронштадтскому, чудотворцу

Кондак 1

Избра́нному во иере́ях, ди́вному уго́днику Бо́жию Иоа́нну, па́стырю и учи́телю, царе́й люби́телю, ско́рбных уте́шителю, земли́ Росси́йской све́тлому свети́льнику, все житие́ свое́ на служе́ние Бо́гу и бли́жним посвяти́вшему и мно́жество гре́шников на покая́ние обрати́вшему; мно́гим же боля́щим исцеле́ние у Бо́га испроси́вшему, соста́вим хвалу́, я́ко хода́таю на́шему и ско́рому помо́щнику. Ты же, о́тче, я́ко име́яй дерзнове́ние ко Го́споду, от вся́ких нас бед свобожда́й, да зове́м ти хвале́бно:

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Икос 1

А́нгела храни́теля своего́, еще́ шестиле́тен сый, в све́тлости неизрече́нней яв узре́л еси́, Иоа́нне, и́же и рече́ тебе́, я́ко по повеле́нию Госпо́дню всегда́ неви́димо сопрису́тствует и храни́т тя от всех зол. Те́мже от ю́ности избра́нника Бо́жия тя ве́дуще, взыва́ем си́це:

Ра́дуйся, от младе́нства по предуве́дению Бо́гом избра́нный; ра́дуйся, от ю́ности в служе́нии Ему́ Того́ благода́тию призва́нный.

Ра́дуйся, А́нгела храни́теля твоего́ из де́тства до́брыми нра́вы весели́вый; ра́дуйся, николи́же того́ чем опеча́ливый.

Ра́дуйся, я́ко незри́мый храни́тель твой я́ве тебе́ яви́ся; ра́дуйся, я́ко той всегда́ храни́ти тя обеща́ся.

Ра́дуйся, благочести́вых роди́телей ча́до возлю́бленное; ра́дуйся, те́ми из де́тска в стра́се Бо́жием воспи́танный.

Ра́дуйся, воздержа́нию от ю́ности себе́ обучи́вый; ра́дуйся, во убо́жестве и нищете́ млады́е дни своя́ препроводи́вый.

Ра́дуйся, я́ко благонра́вия твоего́ ра́ди благода́ть Бо́жия я́ве на тебе́ почива́ше; ра́дуйся, я́ко та лице́ твое́ всегда́ благоумиле́нно творя́ше.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 2

Ви́дим тя, богому́дре Иоа́нне, от ю́на во́зраста благода́тию Бо́жиею осене́на бы́вша и е́ю та́инственно на доброде́тельное житие́ наставля́ема и руководи́ма. Те́мже, иму́ще тя себе́ во о́бразе и подража́ние, уми́льно вопие́м Христу́ Бо́гу: Аллилу́иа.

Икос 2

Ра́зум твой из мла́да в чте́ние и разуме́ние Свяще́ннаго и святооте́ческаго Писа́ния углуби́л еси́, Иоа́нне, и из него́, я́ко губа́, воспринима́л еси́ во́ду жи́ву, от исто́чника Свята́го Ду́ха проистека́ющую. Те́мже мо́лим тя, умоли́ блага́го Го́спода, да сподо́бит прича́стниками бы́ти сея́ живи́тельныя струи́ и нас, взыва́ющих ти си́це:

Ра́дуйся, от младе́нчества чи́ста себе́ от страсте́й соблюды́й; ра́дуйся, благода́ть свята́го креще́ния це́лу и невреди́му сохрани́вый.

Ра́дуйся, чте́ние Боже́ственных Писа́ний усе́рдно возлюби́вый; ра́дуйся, сокрове́нный в них смысл пра́во и до́бре уразуме́вый.

Ра́дуйся, во уче́нии кни́жнем прилежа́ние приме́рное показа́вый; ра́дуйся, в любому́дрии есте́ственнем и духо́внем сла́вно преуспе́вый.

Ра́дуйся, любому́дрием твои́м ми́ра пре́лести ско́ро распозна́вый; ра́дуйся, тех се́тей, я́ко оре́л высокопа́рный, му́дре избежа́вый.

Ра́дуйся, се́верныя Росси́йския страны́ чу́дное и све́тлое воспита́ние; ра́дуйся, мра́ка грехо́внаго в лю́дех разгна́ние.

Ра́дуйся, всем притека́ющим к тебе́ ско́рое вспоможе́ние подава́яй; ра́дуйся, многомо́щное нам пред Бо́гом заступле́ние явля́яй.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 3

Си́ла благода́ти Бо́жия, недостаю́щая восполня́ющая, оби́льно излия́ся на тя, Иоа́нне приснопа́мятне, егда́ от святи́теля Христофо́ра во иере́а рукоположе́н был еси́ и гра́ду Кроншта́дту па́стырь учине́н; отто́ле бо на́чал еси́ учи́ти лю́ди ве́рно служи́ти Свято́й Тро́ице и пе́ти Ей: Аллилу́иа.

Икос 3

Име́я любо́вь Боже́ственную в се́рдце свое́м, му́дрее Иоа́нне, и уста́в поста́ стро́го соблюда́я, удо́бь побора́л еси́ страсте́й двиза́ния, николи́же те́ми запя́т быв. Те́мже, я́ко муж си́лен, изше́л еси́ на де́лание ни́вы Госпо́дни; сло́вом, я́ко ра́лом, разрыхля́я отверде́вшая и оледене́вшая сердца́ челове́ческая, согрева́я же та моли́твою и теплото́ю любве́ твоея́ и насева́я в них семена́ и́скренняго покая́ния и живы́я ве́ры. Сего́ ра́ди воспису́ем ти похвалы́ таковы́я:

Ра́дуйся, избра́нный сосу́де Бо́жия благода́ти; ра́дуйся, даро́в небе́сных вмести́лище.

Ра́дуйся, всем се́рдцем и всем помышле́нием твои́м Бо́га возлюби́вый; ра́дуйся, сего́ ра́ди и ча́да твоя́ духо́вная и́скренне Того́ люби́ти учи́вый.

Ра́дуйся, за́поведи Бо́жия и уста́вы Це́ркве о посте́х опа́сно храни́вый; ра́дуйся, таковы́м хране́нием любо́вь твою́ к Бо́гу и бли́жним де́лы прояви́вый.

Ра́дуйся, от ю́ности над страстьми́ воцари́выйся; ра́дуйся, сла́вен победи́тель над те́ми яви́выйся.

Ра́дуйся, в ми́ре пожи́вый преми́рно; ра́дуйся, на земли́ му́дрствовавый небе́сно.

Ра́дуйся, ца́рства правосла́вно-росси́йскаго сто́лпе неподви́жимый; ра́дуйся, правосла́вия и до́брых обы́чаев блюсти́телю непозы́блемый.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 4

Бу́рею мно́гих бед и волне́ний жите́йских одержи́мым нам помога́й, о́тче Иоа́нне, я́коже и в животе́ твое́м помога́л еси́ всем, с ве́рою к тебе́ притека́вшим, да вси тобо́ю вспомоществу́еми, благода́рно о тебе́ пое́м Бо́гу: Аллилу́иа.

Икос 4

Слы́шав Апо́стола глаго́люща: на́ше житие́ на небесе́х есть, — и измлада́ возжела́в насле́довати е, маловре́менное сие́ житие́ не во угожде́нии пло́ти и рабо́те страсте́м ижди́л еси́, Иоа́нне, но во очище́нии души́ от скверн грехо́вных (с ни́миже никто́же мо́жет вни́ти в Ца́рствие Небе́сное). Те́мже иму́ще тя во о́браз богоуго́днаго жития́ и помо́щника в сем, взыва́ем си́це:

Ра́дуйся, све́та ева́нгельскаго в на́ши дни све́тлое блиста́ние; ра́дуйся, омраче́нных душ вседе́йственное просвеще́ние.

Ра́дуйся, я́ко в Боже́ственная Писа́ния весь ум твой углуби́л еси́; ра́дуйся, я́ко в них стезю́ пра́вую в Ца́рствие Небе́сное обре́л еси́.

Ра́дуйся, я́ко вся дея́ния твоя́ свет ми́ру бы́ша; ра́дуйся, я́ко тобо́ю Оте́ц Небе́сный ди́вно просла́вися.

Ра́дуйся, я́ко сло́во твое́ не бе, я́коже кимва́л бряца́яй, мертв, нечу́вствен; ра́дуйся, я́ко то́е бя́ше вои́стинну жи́во и де́йственно.

Ра́дуйся, я́ко тобо́ю ме́ртвии ду́хом ве́рою оживля́ются; ра́дуйся, я́ко тобо́ю па́дшии в бе́здну грехо́вную к покая́нию возбужда́ются.

Ра́дуйся, я́ко тебе́ во дни на́ши яви́ Госпо́дь земли́ Росси́йстей я́ко проро́ка и апо́стола; ра́дуйся, я́ко в тебе́ врази́ и́стины обрето́ша неустраши́маго обличи́теля и кре́пкаго противобо́рца.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 5

Звезда́ многосве́тлая земли́ Росси́йския, мрак грехо́вный просвеща́ющая, яви́лся еси́, свяще́нне Иоа́нне. Те́мже и ны́не пода́ждь просвеще́ние сы́ном Росси́йским, тьмо́ю заблужде́ния объя́тым и во власть нечести́вых преда́вшимся, да позна́ют свое́ окая́нство и, обрати́вшеся ко Го́споду, в покая́нии возопию́т Ему́: Аллилу́иа.

Икос 5

Ви́девше росси́йстии наро́ди вели́каго тя благоче́стия пропове́дника и многомо́щна пред Бо́гом моли́твенника и предста́теля, во мно́жестве отовсю́ду к тебе́ притека́ху, ини́и же писа́ния своя́ тебе́, о́тче, посыла́ху, исцеле́ния в боле́знех, сове́та в недоуме́ниих и утеше́ния в скорбе́х прося́ще, и улучи́вше жела́нная, благода́рственно тебе́ взыва́ху:

Ра́дуйся, Иоа́нне, но́вый ми́ру свети́льниче; ра́дуйся, непосре́дственный в моли́твах Бо́гу собесе́дниче.

Ра́дуйся, я́ко твоя́ моли́твы си́льны и многомо́щны Влады́ку умилостивля́ти; ра́дуйся, я́ко твое́ к Нему́ предста́тельство многоде́йственно бла́гость Его́ на щедрода́тельство подвиза́ти.

Ра́дуйся, я́ко тобо́ю, по ме́ре ве́ры, подаю́тся благода́тная исцеле́ния; ра́дуйся, я́ко неду́гующии прие́млют тобо́ю ско́рое неду́гов свои́х в здра́вие премене́ние.

Ра́дуйся, я́ко гре́шнии на покая́ние тобо́ю обраща́ются; ра́дуйся, я́ко безчи́ннии крамо́льницы тобо́ю вразумля́ются.

Ра́дуйся, я́ко безу́мнии глуми́телие над та́йнами ве́ры тобо́ю посрамля́ются; ра́дуйся, я́ко посмея́телие чуде́сных твои́х дея́ний тобо́ю подоба́ющее вразумле́ние прие́млют.

Ра́дуйся, скорбя́щих благода́тный уте́шителю; ра́дуйся, в недоуме́нии су́щих бла́гостный вразуми́телю.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 6

Пропове́дником и́стины, богоно́сным отце́м подража́я, всего́ себе́ на служе́ние Бо́гу и бли́жним вдал еси́ и, сан свяще́нства нося́, поко́я не ве́дал еси́, слу́жбы Бо́жия в хра́ме при́сно соверша́я и в до́мех ве́рных моле́бная пе́ния воспева́я, нужда́ющимся же ще́дро благотворя́, та́ко наименова́ние благотво́рца и безсре́бренника стяжа́л еси́, Иоа́нне. Те́мже и по успе́нии твое́м росси́йстии лю́дие прославля́ют и́мя твое́ и, ве́чную па́мять тебе́ возглаша́юще, пою́т Бо́гу: Аллилу́иа.

Икос 6

Возсия́вый от Де́вы Христо́с Бог наш и тьму идолобе́сия све́том Ева́нгелия разгна́вый, яви́ тя, о́тче Иоа́нне, ве́рна и ре́вностна пропове́дника Своея́ и́стины, клевре́тами лука́ваго извраща́емыя. Те́мже, я́ко име́яй дерзнове́ние ко Го́споду, изба́ви от тех зло́бы и кова́рства всех воспева́ющих ти такова́я:

Ра́дуйся, служи́телю Христо́в изря́дный; ра́дуйся, во иере́ех уго́дниче Того́ преизя́щный.

Ра́дуйся, на стра́жи до́ма Бо́жия недре́мленно стоя́вый; ра́дуйся, та́тей духо́вных мече́м сло́ва Бо́жия и моли́твою отгоня́вый.

Ра́дуйся, писа́ньми твои́ми мно́гих от любве́ мирски́я к любви́ Христо́ве подви́гнувый; ра́дуйся, веща́ньми твои́ми любо́вь Бо́жию к челове́ком, во искупле́нии и промышле́нии нам я́вленную, изъяви́вый.

Ра́дуйся, де́йствие Ду́ха Бо́жия на сердца́ челове́ческая удобопости́жно сказа́вый; ра́дуйся, та́йну моли́твеннаго с Бо́гом собесе́дования я́ве указа́вый.

Ра́дуйся, целому́дрие в зако́нном супру́жестве твое́м чуде́сно сохрани́вый; ра́дуйся, мно́гая ча́да духо́вная покая́нием породи́вый.

Ра́дуйся, в сердца́х ве́рных благу́ю па́мять по себе́ оста́вивый; ра́дуйся, я́ко па́мять сия́, я́ко пра́ведника, незабве́нна пребу́дет во ве́ки.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 7

Хотя́ всеблаги́й Госпо́дь уте́шити ве́рныя лю́ди Своя́ и отврати́ти беззако́нных от злых дел их, воздвиже́ тя, Иоа́нне, я́коже не́когда проро́ка Ио́ну Нине́вии гра́ду вели́кому; да пропове́си россия́ном гнев Бо́жий, гряду́щий на ня вско́ре, е́же и сбы́сться по твоему́ веща́нию, и́бо непока́яни в горды́ни пребы́хом и не восхоте́хом с тобо́ю смире́нно пе́ти Христу́ Бо́гу: Аллилу́иа.

Икос 7

Но́ва беда́ и гнев Бо́жий пости́же нас, не восхоте́вших внима́ти богодухнове́нным твои́м глаго́лом: держа́ва бо ца́рства на́шего разруши́ся и слу́гам сатаны́ во власть предаде́ся, и́же честны́я оби́тели и́ноческия разори́ша, святы́я хра́мы оскверни́ша и вся благочести́выя лю́ди лю́те озлоби́ша, и мно́жество духо́внаго и мирска́го чи́на му́ченической сме́рти преда́ша. Те́мже к тебе́, о́тче Иоа́нне, в покая́нии прибега́ем и уми́льно взыва́ем: умоли́ Влады́ку Христа́, да прело́жит гнев Свой на ми́лость и да услы́шит нас, взыва́ющих ти си́це:

Ра́дуйся, покая́ния велегла́сный пропове́дниче; ра́дуйся, гряду́щаго гне́ва Бо́жия на лю́ди согреши́вшия нело́жный провозве́стниче.

Ра́дуйся, нече́стия людска́го громогла́сный обличи́телю; ра́дуйся, о исправле́нии тех ре́вностный рачи́телю.

Ра́дуйся, ца́рства правосла́вно-росси́йскаго при животе́ твое́м кре́пкий опло́т бы́вый; ра́дуйся, от крамо́л во дни о́ны то́е сохрани́вый.

Ра́дуйся, царе́й благочести́вых при́сный люби́миче; ра́дуйся, му́дрый тех сове́тниче и наста́вниче.

Ра́дуйся, о вла́сти ца́рстей, я́ко богоуста́вленной, мно́гая словеса́ провеща́вый; ра́дуйся, к послуша́нию и ве́рности зако́нной той вла́сти лю́ди тща́ливо приводи́вый.

Ра́дуйся, моли́твами твои́ми престо́лы царе́й благочести́вых огражда́яй; ра́дуйся, суды́ пра́вы в лю́дех твори́ти тех поуча́яй.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 8

Стра́нный и необы́чный путь жития́ соверши́л еси́, о́тче Иоа́нне, в ми́ре пожи́в приме́рно и на земли́ небе́сно: в воздержа́нии и целому́дрии, и во всегда́шнем Бо́га славосло́вии вели́ким отце́м подража́л еси́. С ни́ми же ны́не на небеси́ Христу́ в весе́лии предстоя́ и моли́твы о ми́ре принося́, вы́ну пое́ши: Аллилу́иа.

Икос 8

Вси правосла́внии лю́дие, я́коже в животе́, та́ко и по преставле́нии твое́м к Бо́гу, ве́льми чтут тя, о́тче Иоа́нне, ве́рующие, я́ко ве́лие дерзнове́ние к Бо́гу и́маши и мо́лиши бла́гость Его́ о всех к тебе́ притека́ющих и та́ко взыва́ющих:

Ра́дуйся, блага́го ко́рене до́брое прозябе́ние; ра́дуйся, отца́ кли́рика и ма́тере благочести́выя рожде́ние и воспита́ние.

Ра́дуйся, я́ко ма́лая весь Су́ра твоего́ ра́ди в ней рожде́ния и воспита́ния всей земли́ Росси́йстей ве́дома сотвори́ся; ра́дуйся, я́ко град Кроншта́дт твои́м в нем служе́нием просла́вися.

Ра́дуйся, я́ко милосе́рдными де́лы твои́ми вся земля́ Росси́йская напо́лнися; ра́дуйся, я́ко весть о чу́днем и святе́м житии́ твое́м и за преде́лы ея́ распространи́ся.

Ра́дуйся, я́ко писа́ньми твои́ми та́йна благода́тнаго с Бо́гом обще́ния изъясня́ется; ра́дуйся, я́ко си́ми писа́ньми свет духо́внаго озаре́ния в сердца́ чту́щих я излива́ется.

Ра́дуйся, я́ко в писа́ниих твои́х чистота́ души́ твоея́ я́ве прозрева́ется; ра́дуйся, я́ко в них, я́коже в зерца́ле, богоподо́бие души́ челове́ческия отобража́ется.

Ра́дуйся, я́ко писа́ньми твои́ми не то́кмо лю́дие росси́йстии, но инозе́мнии наро́ды во спасе́ние свое́ назида́ются; ра́дуйся, я́ко те́ми писа́ньми и́стинная ве́ра возсиява́ет и мрак ересе́й разгоня́ется.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 9

Вся́кое сло́во не довле́ет к похвале́ твое́й, о́тче Иоа́нне, ты бо Ду́хом Святы́м дви́жим, от ю́ности Бо́гу усе́рдно послужи́л еси́; пе́рвее в изуче́нии Свяще́нных Писа́ний мно́га ле́та усе́рдно тружда́яся и ра́зум глубо́к стяжева́я, та́же о науче́нии отроко́в и о па́стве твое́й приле́жно пеки́йся, всех поуча́л еси́ разу́мно пе́ти Бо́гу: Аллилу́иа.

Икос 9

Вити́я суему́дрый, Лев безу́мный и единомы́сленницы его́, тобо́ю, о́тче Иоа́нне, я́ве посрамле́ни бы́ша во злоче́стии свое́м, правосла́внии же в ве́ре утверди́шася, боговеща́нными твои́ми глаго́лы наставля́еми. Те́мже, восхваля́юще тя, взыва́ем си́це:

Ра́дуйся, це́внице боговеща́нная; ра́дуйся, гу́сли Ду́ха сладкозву́чныя.

Ра́дуйся, словесы́ и писа́ньми твои́ми до́гматы ве́ры уясни́вый; ра́дуйся, веща́ньми твои́ми ве́рных смы́слы в правосла́вии утверди́вый.

Ра́дуйся, я́ко тобо́ю полки́ богобо́рцев победи́шася; ра́дуйся, я́ко тобо́ю яснополя́нский богоотсту́пник и клевре́ты его́ му́дро изобличи́шася.

Ра́дуйся, я́ко тобо́ю душепа́губное того́ уче́ние о душе́ челове́честей, а́ки бы не име́ющей ли́чнаго бытия́, низложи́ся; ра́дуйся, я́ко тобо́ю и́стинное уче́ние о безсме́ртии и ли́чно безконе́чном пребыва́нии ея́ утверди́ся.

Ра́дуйся, ра́зума Боже́ственнаго му́дрый изъяви́телю; ра́дуйся, та́инств церко́вных благогове́йный соверши́телю.

Ра́дуйся, благонаде́жный в Ца́рствие Небе́сное руководи́телю; ра́дуйся, пути́ спаси́тельнаго и́стинный учи́телю.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 10

Спасти́ хотя́ ду́шу твою́, мно́гих святы́х доброде́тели в себе́ совокупи́л еси́, о́тче Иоа́нне: апо́стольское и святооте́ческое ве́ры испове́дание, му́ченическую в благоче́стии тве́рдость, всегда́шнее в моли́твах бо́дрствование, воздержа́ние и смире́ние, вку́пе же и по́двиги преподо́бных. Те́мже ны́не со святы́ми на небеси́ водворя́яся и непреста́нно Бо́га славосло́вя, помина́й нас, сла́вную па́мять твою́ почита́ющих и пою́щих Бо́гу: Аллилу́иа.

Икос 10

Царя́ Небе́снаго усе́рдный священнослужи́телю и земны́х благочести́вых царе́й ве́рный чти́телю и люби́телю, о́тче Иоа́нне; обо́им пра́ведно благоугоди́вый, воздая́ ке́сарево ке́сареви и Бо́жия Бо́гови, и вся лю́ди тому́ же поуча́л еси́. Сего́ ра́ди восхваля́ем тя и глаго́лем си́це:

Ра́дуйся, ра́бе Бо́жий, благи́й и ве́рный; ра́дуйся, служи́телю Того́ усе́рдный.

Ра́дуйся, вся повеле́нная от Го́спода тща́ливо твори́вый; ра́дуйся, за́поведей Его́ иску́сный де́латель бы́вый.

Ра́дуйся, о вездесу́щии Бо́жии всегда́ помышля́вый; ра́дуйся, у́мным очесе́м свои́м Того́ вы́ну представля́вый.

Ра́дуйся, благочести́вых царе́й Росси́йских, я́ко слуг Бо́жиих, почита́вый; ра́дуйся, благи́ми сове́ты и моли́твами твои́ми в тру́дном их по́двиге народоправле́ния помога́вый.

Ра́дуйся, к попече́нию о бла́ге Це́ркве и наро́да своего́ тех подвиза́вый; ра́дуйся, от крамо́л и мятеже́й в животе́ твое́м тех защища́вый.

Ра́дуйся, и ны́не о ца́рстве правосла́вно-росси́йском Бо́га умоля́яй; ра́дуйся, ски́птры царе́й правосла́вных утвержда́яй.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 11

Пе́сней похвало́ю невозмо́жно есть изобрази́ти мно́жество о Бо́зе исправле́ний твои́х, о пречу́дне о́тче Иоа́нне; я́же соверши́л еси́ во всем житии́ твое́м; немощны́я моли́твами твои́ми исцеля́я, бе́сы от челове́к изгоня́я, пья́нством и ины́ми страстьми́ неду́говавшия врачу́я, в нищете́ же и убо́жестве су́щия оби́льно ущедря́я, и всем по коего́ждо потре́бе помога́я и благотворя́, я́ко всем благода́рно о тебе́ пе́ти Бо́гу: Аллилу́иа.

Икос 11

Свети́льника све́тла и прозорли́вца ди́вна яви́ тя Госпо́дь во днех на́ших, провозвести́вша гряду́щий гнев Его́ на ца́рство правосла́вно-росси́йское, зане́ не пока́яхомся про́поведию твое́ю. Те́мже, я́ко проро́ка Бо́жия и провозве́стника Того́ суде́б, ублажа́ем тя и в покая́нии взыва́ем:

Ра́дуйся, прови́дче ди́вный; ра́дуйся, бу́дущих собы́тий предсказа́телю нело́жный.

Ра́дуйся, дре́вним покая́ния пропове́дником ра́вный; ра́дуйся, но́вым прови́дцем равноче́стный.

Ра́дуйся, сокрове́нных суде́б Бо́жиих яснозри́телю; ра́дуйся, гряду́щаго гне́ва Бо́жия на нераска́янныя гре́шники возвести́телю.

Ра́дуйся, покая́ния сладкогла́сный глаша́таю; ра́дуйся, смяте́нных серде́ц умири́телю.

Ра́дуйся, многомо́щный наш пред Бо́гом хода́таю; ра́дуйся, благонаде́жный наш пред Ним предста́телю.

Ра́дуйся, до́брый слове́сных ове́ц па́стырю, мно́жество заблу́ждших душ взыска́вый; ра́дуйся, от уз темни́чных и сме́рти мно́гих свободи́вый.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 12

Благода́ть Бо́жия, ю́же прия́л еси́ сугу́бо во святе́м креще́нии и во иере́йстем рукоположе́нии, не во́тще в тебе́ бысть, о́тче Иоа́нне: раче́нием бо твои́м употреби́л еси́ сию́ на по́льзу мно́гим и во сла́ву Дарода́теля ея́; све́тлостию бо жития́ твоего́ и де́лы милосе́рдными ве́льми просла́вися Оте́ц Небе́сный, и от мно́жества уст, тобо́ю духо́вно и теле́сно облагоде́тельствованных, возно́сится Тому́ вели́кая песнь: Аллилу́иа.

Икос 12

Пою́ще богоуго́дное твое́ от ю́ности житие́ и духо́вное от си́лы в си́лу восхожде́ние, ублажа́ем пра́ведную твою́ кончи́ну и сла́вное погребе́ние благода́тных твои́х моще́й, обре́тших ве́чный поко́й в созда́нней тобо́ю деви́чей оби́тели. Ве́руем же, я́ко и свята́я душа́ твоя́ упоко́ися в пресве́тлых ра́йских селе́ниих, и́хже насле́довати помози́ нам, возглаша́ющим ти похвалы́ сицевы́я:

Ра́дуйся, тече́ние вре́менныя жи́зни ра́вно и богоуго́дно сконча́вый; ра́дуйся, ве́ру пра́вую непоро́чну сохрани́вый.

Ра́дуйся, ми́рною христиа́нскою кончи́ною пра́ведность твою́ извести́вый; ра́дуйся, поко́й ве́чный на небеси́ со святы́ми получи́вый.

Ра́дуйся, ра́дости пра́ведных во оби́телех ра́йских причасти́выйся; ра́дуйся, со мно́жеством душ, тобо́ю спасе́ние улучи́вших, блаже́нства ве́чнаго сподо́бивыйся.

Ра́дуйся, с ца́рственными новому́ченики Ца́рство Небе́сное насле́дивый; ра́дуйся, с ни́ми Царю́ сла́вы предстоя́й и о избавле́нии оте́чества на́шего от безбо́жных враг моли́твы вознося́й.

Ра́дуйся, вели́кий правосла́вия побо́рниче; ра́дуйся, непреодоли́мый благоче́стия защи́тниче.

Ра́дуйся, со́нными явле́ньми пресла́вно чудотворя́й; ра́дуйся, иносла́вныя ко правосла́вию приводя́й.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 13

О всечестны́й о́тче Иоа́нне, не Кроншта́дтский то́кмо, но и всеросси́йский, па́че же — всеми́рный свети́льниче и вели́кий Христо́в уго́дниче! Приими́ от нас недосто́йных хвале́бное сие́ пе́ние и благоприя́тными твои́ми к Бо́гу моли́твами изба́ви нас от бед вре́менных и муче́ний ве́чных, да сподо́бимся с тобо́ю в Ца́рствии Небе́снем ве́чно воспева́ти: Аллилу́иа. (Кондак читается трижды.)

Икос 1

А́нгела храни́теля своего́, еще́ шестиле́тен сый, в све́тлости неизрече́нней яв узре́л еси́, Иоа́нне, и́же и рече́ тебе́, я́ко по повеле́нию Госпо́дню всегда́ неви́димо сопрису́тствует и храни́т тя от всех зол. Те́мже от ю́ности избра́нника Бо́жия тя ве́дуще, взыва́ем си́це:

Ра́дуйся, от младе́нства по предуве́дению Бо́гом избра́нный; ра́дуйся, от ю́ности в служе́нии Ему́ Того́ благода́тию призва́нный.

Ра́дуйся, А́нгела храни́теля твоего́ из де́тства до́брыми нра́вы весели́вый; ра́дуйся, николи́же того́ чем опеча́ливый.

Ра́дуйся, я́ко незри́мый храни́тель твой я́ве тебе́ яви́ся; ра́дуйся, я́ко той всегда́ храни́ти тя обеща́ся.

Ра́дуйся, благочести́вых роди́телей ча́до возлю́бленное; ра́дуйся, те́ми из де́тска в стра́се Бо́жием воспи́танный.

Ра́дуйся, воздержа́нию от ю́ности себе́ обучи́вый; ра́дуйся, во убо́жестве и нищете́ млады́е дни своя́ препроводи́вый.

Ра́дуйся, я́ко благонра́вия твоего́ ра́ди благода́ть Бо́жия я́ве на тебе́ почива́ше; ра́дуйся, я́ко та лице́ твое́ всегда́ благоумиле́нно творя́ше.

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Кондак 1

Избра́нному во иере́ях, ди́вному уго́днику Бо́жию Иоа́нну, па́стырю и учи́телю, царе́й люби́телю, ско́рбных уте́шителю, земли́ Росси́йской све́тлому свети́льнику, все житие́ свое́ на служе́ние Бо́гу и бли́жним посвяти́вшему и мно́жество гре́шников на покая́ние обрати́вшему; мно́гим же боля́щим исцеле́ние у Бо́га испроси́вшему, соста́вим хвалу́, я́ко хода́таю на́шему и ско́рому помо́щнику. Ты же, о́тче, я́ко име́яй дерзнове́ние ко Го́споду, от вся́ких нас бед свобожда́й, да зове́м ти хвале́бно:

Ра́дуйся, Иоа́нне, но́вый росси́йский свети́льниче и те́плый о нас к Бо́гу моли́твенниче.

Молитва

О́тче Иоа́нне досточу́дне! Ты доброде́тельми мно́гими к Бо́гу прибли́зился еси́ и дарова́ний духо́вных от Него́ сподо́бился еси́: неду́ги врачева́ти, стра́сти прогоня́ти и ско́рби утоля́ти. Те́мже смире́нно мо́лим тя: пода́ждь неду́гом на́шим исцеле́ние и страсте́м врачева́ние, находя́щия же на нас ско́рби утоли́ и ра́дость духо́вную в сердца́ на́ша всели́. И помози́ нам подража́тельми бы́ти свята́го твоего́ жития́ и всех благи́х твои́х дея́ний, я́ко да сподо́бимся с тобо́ю насле́дия Ца́рствия Небе́снаго. Ами́нь.