Молитвы Архангелу Гавриилу

Тропарь, глас 4-й

Небе́сных во́инств Архистрати́же, мо́лим тя при́сно мы недосто́йнии, да твои́ми моли́твами огради́ши нас кро́вом крил невеще́ственныя твоея́ сла́вы, сохраня́я ны, припа́дающия приле́жно и вопию́щия: от бед изба́ви ны, я́ко чинонача́льник вы́шних Сил.

Кондак, глас 2-й

Архистрати́же Бо́жий, служи́телю Боже́ственныя сла́вы, А́нгелов нача́льниче и челове́ков наста́вниче, поле́зное нам проси́ и ве́лию ми́лость, я́ко безпло́тных Архистрати́г.

Молитва 1-я

О, святы́й Арха́нгеле Гаврии́ле! Всеусе́рдно мо́лим тя, наста́ви нас, раб Бо́жиих (имена), к покая́нию от злых дел и ко утвержде́нию в ве́ре на́шей, укрепи́ и огради́ ду́ши на́ша от искуше́ний прельсти́тельных и умоли́ Созда́теля на́шего о отпуще́нии грехо́в на́ших. О, святы́й вели́кий Гаврии́ле Арха́нгеле! Не пре́зри нас, гре́шных, моля́щихся тебе́ о по́мощи и заступле́нии твое́м, в ве́це сем и буду́щем, но при́сно помо́щник нам яви́ся, да непреста́нно сла́вим Отца́ и Сы́на и Свята́го Ду́ха держа́ву и твое́ предста́тельство во ве́ки веко́в.

Молитва 2-я

Святы́й вели́кий Арха́нгеле Гаврии́ле! Бо́жию Престо́лу предстоя́й и озаре́нием от Боже́ственнаго све́та осия́нный, ве́дением же непостижи́мых Та́ин о преве́чней прему́дрости Его́ просвеще́нный! Всеусе́рдно молю́ Тя: наста́ви мя к покая́нию от злых дел и ко утвержде́нию в ве́ре мое́й, укрепи́ и огради́ ду́шу мою́ от искуше́ний прельсти́тельных, и умоли́ Созда́теля на́шего о отпуще́нии грехо́в мои́х. О, святы́й вели́кий Гаврии́ле Арха́нгеле! Не пре́зри мене́ гре́шнаго, моля́щагося тебе́ о по́мощи и заступле́нии твое́м в ве́це сем и в бу́дущем, но при́сно помо́щник мне яви́ся, да непреста́нно сла́влю Отца́ и Сы́на и Свята́го Ду́ха держа́ву и твое́ предста́тельство во ве́ки веко́в. Ами́нь.

Молитва 3-я

О, святы́й Арха́нгеле Бо́жий Гаврии́ле, при́сно предстоя́й Престо́лу Всевы́шняго, прера́достный благове́стниче и усе́рдный споспе́шниче на́шего спасе́ния! С сво́йственным тебе́ милосе́рдием приими́ сие́ хвале́бное пе́ние, от нас, недосто́йных, тебе́ приноси́мое. Испра́ви моли́твы на́ша, и принеси́ я, я́ко фимиа́м, на Небе́сный олта́рь кади́льный, озари́ у́мы на́ша све́том позна́ния та́ин спаси́тельныя ве́ры на́шея, воспламени́ сердца́ на́ша любо́вию ко Христу́ Спаси́телю на́шему, обрати́ и укрепи́ жела́ния на́ша на спаси́тельный путь ева́нгельских Его́ за́поведей, да в сем ве́це ти́хо и багоче́стно поживе́м во сла́ву Бо́жию, в бу́дущем же не лиши́мся ве́чнаго Ца́рствия Бо́жия, е́же получи́ти да сподо́бимся благода́тию Христа́ Бо́га на́шего, хода́тайством Пречи́стыя Его́ Ма́тере, Пренепоро́чныя Де́вы Мари́и, и твои́ми многомо́щными ко Го́споду Бо́гу о нас моли́твами, и да просла́вим с тобо́ю и про́чими безпло́тными си́лами небе́сными и все́ми святы́ми Еди́наго во Тро́ице сла́вимаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.