Молитва перед началом всякого дела

Тропарь, глас 4-й

Тво́рче и Созда́телю вся́ческих, Бо́же, дела́ рук на́ших, ко сла́ве Твое́й начина́емая, Твои́м благослове́нием спе́шно испра́ви, и нас от вся́каго зла изба́ви, я́ко еди́н Всеси́лен и Человеколю́бец.

Кондак, глас 3-й

Ско́рый в заступле́ние и кре́пкий в по́мощь, предста́ни благода́тию си́лы Твоея́ ны́не, и благослови́в укрепи́, и в соверше́ние наме́рения блага́го де́ла рабо́в Твои́х произведи́: вся бо ели́ка хо́щеши, я́ко Си́льный Бог, твори́ти мо́жеши.

Молитва перед началом всякого дела

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Благослови́, Го́споди, и помоги́ мне, гре́шному, соверши́ть начина́емое мно́ю де́ло, во сла́ву Твою́.

Го́споди Иису́се Христе́, Сы́не Единоро́дный Безнача́льнаго Твоего́ Отца́, Ты бо рекл еси́ пречи́стыми усты́ Твои́ми: я́ко без Мене́ не мо́жете твори́ти ничесо́же. Го́споди мой, Го́споди, ве́рою объе́мь в души́ мое́й и се́рдцы Тобо́ю рече́нная, припа́даю Твое́й бла́гости: помози́ ми, гре́шному, сие́ де́ло, мно́ю начина́емо, о Тебе́ Саме́м соверши́ти, во и́мя Отца́, и Сы́на, и Свята́го Ду́ха, моли́твами Богоро́дицы и всех Твои́х святы́х. Ами́нь.

Если времени мало, то достаточно про себя произнести:

Го́споди, благослови́.