Канон умилительный
ко Господу нашему
Иисусу Христу
- Песнь 1
- Песнь 3
- Песнь 4
- Песнь 5
- Песнь 6
- Песнь 7
- Песнь 8
- Песнь 9
- Молитва ко Господу нашему Иисусу Христу
Песнь 1
Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть: препросла́вленный Госпо́дь, сла́вно бо просла́вися.
Припев: Иису́се Сладча́йший, спаси́ мя.
Иису́се Сладча́йший Христе́, Иису́се долготерпели́ве, души́ моея́ я́звы исцели́, Иису́се, и услади́ се́рдце мое́, Многоми́лостиве, молю́ся, Иису́се Спа́се мой, да велича́ю Тя спаса́емый.
Припев: Иису́се Сладча́йший, спаси́ мя.
Иису́се Сладча́йший Христе́, Иису́се, отве́рзи ми покая́ния дверь, человеколю́бче Иису́се, и приими́ мя, Тебе́ припа́дающа, и те́пле прося́ща, Иису́се Спа́се мой, согреше́ний проще́ния.
Сла́ва Отцу́, и Сы́ну, и Свято́му Ду́ху.
Иису́се Сладча́йший Христе́, Иису́се, исхи́ти мя из руки́ льсти́ваго велиа́ра, Иису́се, и сотвори́ десна́го предстоя́теля сла́вы Твоея́, Иису́се Спа́се мой, ча́сти шу́ия мя избавля́яй.
И ны́не и при́сно, и во ве́ки веко́в. Ами́нь.
Иису́са ро́ждшая Бо́га Влады́чице, моли́ о непотре́бных рабе́х, Пречи́стая, я́ко да му́ки моли́твами Твои́ми изба́вимся, Нескве́рная, оскверне́ннии, сла́вы присносу́щныя наслажда́ющеся.
Песнь 3
Ирмос: На ка́мени мя ве́ры утверди́в, разшири́л еси́ уста́ моя́ на враги́ моя́. Возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.
Припев: Иису́се Сладча́йший, спаси́ мя.
Услы́ши, человеколю́бче Иису́се мой, раба́ Твоего́, вопию́ща во умиле́нии, и изба́ви мя, Иису́се, осужде́ния и му́ки, еди́не долготерпели́ве, Иису́се Сладча́йший Многоми́лостиве.
Припев: Иису́се Сладча́йший, спаси́ мя.
Подъими́ раба́ Твоего́, Иису́се мой, припа́дающа со слеза́ми, Иису́се мой, и спаси́, Иису́се мой, ка́ющагося мя, и гее́нны, Влады́ко, изба́ви, Иису́се Сладча́йший Многоми́лостиве.
Сла́ва Отцу́, и Сы́ну, и Свято́му Ду́ху.
Вре́мя, Иису́се мой, е́же дал ми еси́, во стра́сти ижди́х, Иису́се мой; те́мже, Иису́се мой, не отве́ржи мя, но воззови́, молю́ся, Влады́ко, Иису́се Сладча́йший, и спаси́.
И ны́не и при́сно, и во ве́ки веко́в. Ами́нь.
Де́во, ро́ждшая Иису́са моего́, моли́ изба́вити мя гее́нны, еди́но предста́тельство оскорбля́емых, Богоблагода́тная, и сподо́би мя жи́зни, Всенепоро́чная, нестаре́ющияся.
Спа́се мой Иису́се, блу́днаго спасы́й, Спа́се мой Иису́се, прие́мый блудни́цу, и мене́ ны́не поми́луй, Иису́се Многоми́лостиве, спаси́, уще́дри, о Иису́се благоде́телю, я́коже, благоутро́бне, Манасси́ю, Иису́се мой, я́ко еди́н человеколю́бец.
Песнь 4
Ирмос: Прише́л еси́ от Де́вы, не хода́тай, ни А́нгел, но Сам, Го́споди, вопло́щся, и спасл еси́ всего́ мя челове́ка. Тем зову́ Ти: сла́ва си́ле Твое́й, Го́споди.
Припев: Иису́се Сладча́йший, спаси́ мя.
Исцели́, Иису́се мой, души́ моея́ я́звы, Иису́се мой, молю́ся, и руки́ мя исхи́ти, Иису́се мой благоутро́бне, душетле́ннаго велиа́ра, и спаси́.
Припев: Иису́се Сладча́йший, спаси́ мя.
Согреши́х, Иису́се мой Сладча́йший благоутро́бне, Иису́се мой, спаси́ мя, прибега́ющаго к покро́ву Твоему́, Иису́се долготерпели́ве, и ца́рствия Твоего́ мя сподо́би.
Сла́ва Отцу́, и Сы́ну, и Свято́му Ду́ху.
Никто́же согреши́, Иису́се мой, я́коже согреши́х аз окая́нный, но припа́даю моля́ся, Иису́се мой, спаси́ мя, и жи́зни, Иису́се мой, насле́дие ми да́руй.
И ны́не и при́сно, и во ве́ки веко́в. Ами́нь.
Всепе́тая, Иису́са ро́ждшая Го́спода, Того́ моли́ изба́вити му́ки вся, пою́щия Тя, и Богоро́дицу вои́стину имену́ющия.
Песнь 5
Ирмос: Просвеще́ние во тме лежа́щих, спасе́ние отча́янных, Христе́ Спа́се мой, к Тебе́ у́тренюю, Царю́ ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.
Припев: Иису́се Сладча́йший, спаси́ мя.
Ты просвеще́ние, Иису́се мой, ума́ моего́, Ты спасе́ние отча́янныя души́ моея́, Спа́се, Ты, Иису́се мой, му́ки изба́ви, и гее́нны мя, зову́ща: спаси́, Иису́се мой Христе́, мя окая́ннаго.
Припев: Иису́се Сладча́йший, спаси́ мя.
Всеконе́чно, Иису́се мой, ко стра́сти безче́стия низве́ржен ны́не зову́: Ты, Иису́се мой, по́мощи ми ру́ку низпосла́в, исто́ргни, зову́ща: спаси́, Иису́се мой Христе́, мя окая́ннаго.
Сла́ва Отцу́, и Сы́ну, и Свято́му Ду́ху.
Оскверне́н ум, Иису́се мой, обнося́ взыва́ю Ти: очи́сти мя от скве́рны прегреше́ний, и изба́ви мя во глубины́ зло́бы от неве́дения низпопо́лзшагося, Спа́се Иису́се мой, и спаси́ мя, молю́ся.
И ны́не и при́сно, и во ве́ки веко́в. Ами́нь.
Иису́са ро́ждшая, Отрокови́це Богороди́тельнице, Того́ умоли́ спасти́ вся правосла́вныя, мона́хи и мирски́я, и гее́нны изба́вити зову́щия: ра́зве Тебе́ предста́тельства тве́рдаго не зна́ем.
Песнь 6
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.
Припев: Иису́се Сладча́йший, спаси́ мя.
Иису́се мой Христе́ Многоми́лостиве, испове́дающася приими́ мя, Влады́ко, о Иису́се, и спаси́ мя, и от тли, Иису́се, мя исхи́ти.
Припев: Иису́се Сладча́йший, спаси́ мя.
Иису́се мой, никто́же бысть ин блудни́к, я́коже аз стра́стный, о Иису́се человеколю́бче: но Ты, Иису́се, мя спаси́.
Сла́ва Отцу́, и Сы́ну, и Свято́му Ду́ху.
Иису́се мой, блудни́цу и блу́днаго, и Манасси́ю и мытаря́ преидо́х, о Иису́се мой, страстьми́, и разбо́йника, Иису́се, и ниневи́тяны.
И ны́не и при́сно, и во ве́ки веко́в. Ами́нь.
Иису́са Христа́ моего́ ро́ждшая, Пречи́стая Де́во, еди́на нескве́рная, оскверне́на су́ща мя, моли́тв Твои́х иссо́пом ны́не очи́сти.
Песнь 7
Ирмос: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.
Припев: Иису́се Сладча́йший, спаси́ мя.
Христе́ Иису́се, никто́же согреши́ на земли́ от ве́ка, о Иису́се мой, я́коже согреши́х аз окая́нный и блу́дный, те́мже, Иису́се мой, вопию́ Ти: пою́ща мя уще́дри, благослове́н еси́, Бо́же оте́ц на́ших.
Припев: Иису́се Сладча́йший, спаси́ мя.
Христе́ Иису́се, ко стра́ху Твоему́, вопию́, пригвозди́ мя, о Иису́се мой, и окорми́ ны́не ко приста́нищу благоти́шному я́ко да, Иису́се мой ще́дре, пою́ Ти спаса́емый: благослове́н еси́, Бо́же оте́ц на́ших.
Сла́ва Отцу́, и Сы́ну, и Свято́му Ду́ху.
Христе́ Иису́се, тма́ми обеща́х Тебе́ стра́стный, о Иису́се мой, покая́ние, но солга́х окая́нный. Те́мже, Иису́се мой, вопию́ Ти: нечу́вственне пребыва́ющую ду́шу мою́ просвети́, Христе́, отце́в Бо́же, благослове́н еси́.
И ны́не и при́сно, и во ве́ки веко́в. Ами́нь.
Христа́ Иису́са ро́ждшая стра́нно, и па́че естества́, Того́ моли́, Всенепоро́чная, я́же чрез естество́ моя́ прегреше́ния вся прости́ти ми, Отрокови́це, да зову́ спаса́ем: благослове́нна еси́, Бо́га пло́тию ро́ждшая.
Песнь 8
Ирмос: В пещь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся ве́ки.
Припев: Иису́се Сладча́йший, спаси́ мя.
Тя, Иису́се мой, молю́, я́коже блудни́цу, Иису́се мой, изба́вил еси́ мно́гих согреше́ний, та́ко и мене́, Иису́се Христе́ мой, изба́ви, и очи́сти оскверне́нную ду́шу мою́, Иису́се мой.
Припев: Иису́се Сладча́йший, спаси́ мя.
Преклони́вся, Иису́се, безслове́сными сластьми́, безслове́сен яви́хся, и ското́м вои́стинну, о Иису́се мой, стра́стно окая́нный уподо́бихся, Спа́се: те́мже, Иису́се, безслове́сия мя изба́ви.
Сла́ва Отцу́, и Сы́ну, и Свято́му Ду́ху.
Впад, о Иису́се, в душетле́нныя разбо́йники, обнажи́хся оде́жды, Иису́се мой, боготка́нныя ны́не, и лежу́ ра́нами уя́звен: еле́й, Христе́ мой, возле́й на мя и вино́.
И ны́не и при́сно, и во ве́ки веко́в. Ами́нь.
Иису́са моего́ и Бо́га носи́вшая Христа́ несказа́нно, Богоро́дице Мари́е, Того́ моли́ при́сно, от бед спасти́ся рабо́м Твои́м и певце́м Твои́м, неискусому́жная Де́во.
Песнь 9
Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося нас ра́ди, ве́рнии единому́дренно пе́сньми велича́ем.
Припев: Иису́се Сладча́йший, спаси́ мя.
Манасси́ю, Иису́се мой, мытаря́, блудни́цу, блу́днаго, ще́дре Иису́се, и разбо́йника преидо́х, Иису́се мой, в де́лех сту́дных и безме́стных, Иису́се: но Ты, Иису́се мой, предвари́в мя, спаси́.
Припев: Иису́се Сладча́йший, спаси́ мя.
От Ада́ма, Иису́се мой, согреши́вшия вся, пре́жде зако́на и в зако́не Иису́се, и по зако́не окая́нный, и благода́ти, Иису́се мой, победи́х страстьми́ окая́нно: но Ты, Иису́се мой, судьба́ми Твои́ми спаси́ мя.
Сла́ва Отцу́, и Сы́ну, и Свято́му Ду́ху.
Да не отлуче́н бу́ду, Иису́се мой, неизрече́нныя Твоея́ сла́вы, да не улучу́ ча́сти, Иису́се, шу́ия, Сладча́йший Иису́се: но Ты мя десны́м овца́м Твои́м, Христе́ Иису́се мой, сочета́в упоко́й, я́ко благоутро́бен.
И ны́не и при́сно, и во ве́ки веко́в. Ами́нь.
Иису́са, Богоро́дице, Его́же носи́ла еси́, еди́на неискусому́жная Де́во Мари́е: Того́, Чи́стая, уми́лостиви, я́ко Сы́на Твоего́ и Зижди́теля, изба́вити притека́ющия к Тебе́ искуше́ний и бед, и огня́ бу́дущаго.
Светилен
Иису́се, прему́дрости и смы́сла пода́телю, ни́щих корми́телю, си́рых засту́пниче, боля́щих врачу́, исцели́ и просвети́ мое́ се́рдце, Иису́се, стру́пы грехо́вными и страсте́й тле́ю покрове́нное, Иису́се, и спаси́ мя.
Богородичен
Сия́нием, Де́во, из Тебе́ возсия́вшаго Све́та, ум мой озари́, се́рдце просвети́, тьму грехо́вную отгоня́ющи, и мглу ле́ности моея́ потребля́ющи.
Стихиры, глас 4-й
Ди́вное и́мя Твое́, Иису́се Спа́се наш, а́нгели пою́т на небеси́, и мы гре́шнии на земли́ бре́нными устна́ми воспева́ем, его́же ра́ди поми́луй нас.
Превели́кое и́мя Твое́, Спа́се, на небеси́ одесну́ю Отца́ седя́щу Ти, почита́ется: на земли́ же неизрече́нное Твое́ воплоще́ние сла́вится: во ад же соше́ствие бе́сы устраша́ет, от ни́хже и нас изба́ви, Христе́ Бо́же, и спаси́ нас.
Авваку́м, я́ко в гада́нии разуме́в чу́дная дела́ Твоя́, со стра́хом удиви́ся и прибли́жившымся ле́том позна́лся еси́ блудни́цами и разбо́йникам, Иису́се: аз же окая́нный в небреже́нии пребыва́ю. Но даждь ми поне́ отны́не ра́зум и страх Твой, милосе́рде, и ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.
Изба́вительнице кре́пкая на Тя наде́ющымся, к ти́хому приста́нищу боже́ственнаго хоте́ния наста́ви мя, Богоро́дице, ма́терним Твои́м дерзнове́нием, е́же и́маши к Сы́ну Твоему́, Богоневе́сто.
Молитва ко Господу нашему
Иисусу Христу
Тебе́, Го́споди, еди́ному благо́му и не памятозло́бному, испове́даю грехи́ моя́: Тебе́ припа́даю, вопия́ недосто́йный: согреши́х, Го́споди, согреши́х, и несмь досто́ин воззре́ти на высоту́ небе́сную, от мно́жества непра́вд мои́х. Но, Го́споди мой, Го́споди, да́руй ми сле́зы умиле́ния, еди́ный бла́же и ми́лостивый: я́ко да и́ми Тя умолю́, очи́ститися пре́жде конца́ от вся́каго греха́: стра́шно бо и гро́зно ме́сто и́мам проити́, те́ла разлучи́вся, и мно́жество мя мра́чное и безчелове́чное де́монов сря́щет, и никто́же в по́мощь спу́тствуяй, или избавля́яй. Тем припа́даю Твое́й бла́гости, не преда́ждь оби́дящым мя, ниже́ да похва́лятся о мне врази́ мои, благи́й Го́споди, ниже́ да реку́т: в ру́ки на́ша прише́л еси́, и нам пре́дан еси́. Ни, Го́споди, не забу́ди щедро́т Твои́х, и не возда́ждь ми по беззако́нием мои́м, и не отврати́ лица́ Твоего́ от мене́: но Ты, Го́споди, накажи́ мя, оба́че ми́лостию и щедро́тами: враг же мой да не возра́дуется о мне, но угаси́ его́ на мя преще́ния, и все упраздни́ его́ де́йство, и даждь ми к Тебе́ путь неуко́рный, благи́й Го́споди: зане́же и согреши́в, не прибего́х ко ино́му врачу́, и не простро́х руки́ моея́ к бо́гу чужде́му. Не отри́ни у́бо моле́ния моего́, но услы́ши мя Твое́ю бла́гостию, и утверди́ мое́ се́рдце стра́хом Твои́м, и да бу́дет благода́ть Твоя́ на мне, Го́споди, я́ко огнь попаля́яй нечи́стыя во мне по́мыслы. Ты бо еси́, Го́споди, свет, па́че вся́каго све́та; ра́дость, па́че вся́кия ра́дости; упокое́ние, па́че вся́каго упокое́ния; жизнь и́стинная, и спасе́ние пребыва́ющее во ве́ки веко́в, ами́нь.