Молитва за умершего скоропостижно

Го́споди Иису́се Христе́, Влады́ко живота́ и сме́рти, Ты рекл еси́ в святе́м Твое́м Ева́нгелии: бди́те, не ве́сте бо, когда́ прии́дет Сын Челове́ческий, в о́ньже час не мни́те, Сын Челове́ческий прии́дет. Но мы земни́и и гре́шнии, преда́вшеся печа́лем и сласте́м жите́йским, забве́нию предае́м час сме́рти своея́, и та́ко призыва́еми быва́ем к Тебе́, Судие́ не́ба и земли́, внеза́пу, в час, в о́ньже не ча́яхом и не мни́хом. Та́ко внеза́пу при́зван бысть к Тебе́ усо́пший раб Твой, брат наш (имя). Неизследи́мы и непостижи́мы пути́ ди́внаго Твоего́ смотре́ния на нас, Го́споди Спаси́телю! Смире́нно преклоня́ю главу́ свою́ пред си́ми Твои́ми путя́ми, Го́споди Влады́ко, и молю́ Тя усе́рдною мое́ю ве́рою, при́зри с высоты́ свята́го жили́ща Твоего́ и осени́ мя Свое́ю благода́тию, да испра́вится моли́тва моя́ сия́ пред Тобо́ю, я́ко кади́ло благово́нное. Преми́лостиве Го́споди, услы́ши моли́тву мою́ за раба́ Твоего́, по неисповеди́мым судьба́м Твои́м внеза́пу похи́щеннаго от нас сме́ртию; пощади́ и поми́луй претре́петную его́ ду́шу, по́званную к нелицеприя́тному Твоему́ Суду́ в час, в о́ньже не ча́яше, Да не я́ростию Твое́ю обличи́ши ю, ниже́ гне́вом Твои́м нака́жеши ю; но пощади́ и поми́луй ю, ра́ди кре́стных заслу́г Свои́х и моли́тв ра́ди Пречи́стыя Своея́ Ма́тере и всех святы́х Твои́х, прости́ ей вся согреше́ния, во́льная и нево́льная, я́же сло́вом, я́же де́лом, я́же ве́дением и неве́дением. А́ще и восхи́щен бысть раб Твой (имя), но оба́че в жи́зни сей ве́рова в Тя и испове́да Тя, Бо́га и Спа́са ми́ру Христа́, и на Тя упова́ние име́яше: сию́ у́бо ве́ру и сие́ упова́ние вме́сто дел вмени́. Милосе́рде Го́споди! Ты не хо́щеши сме́рти гре́шника, но ми́лостиво прие́млеши от него́ и за него́ вся, ко обраще́нию и спасе́нию соде́лываемая, и Сам благоустроя́еши путь его́, е́же жи́ву бы́ти ему́. Молю́ у́бо Тя, благоволи́ та́кожде воспомяну́ти вся дела́ милосе́рдия и вся моле́ния, зде на земли́ твори́мыя за усо́пшаго раба́ Твоего́, благоволи́ прия́ти и мою́ моли́тву о нем ку́пно с моли́твами священнослужи́телей Святы́я Це́ркве Твоея́, и отпусти́ти душе́ его́ вся согреше́ния, умири́ти смяте́нное се́рдце его́, пощади́ти его́ от ве́чныя му́ки и упоко́ити в ме́сте све́тле. Я́ко Твое́ есть, е́же ми́ловати и спаса́ти ны, Христе́, Спа́се наш, и Тебе́ Еди́ному подоба́ет неизрече́нная бла́гость и ве́чная сла́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.