Razumnikum.ru
Главные молитвы Отче наш Иисусова молитва Царю Небесный Богородице Дево, радуйся Молитвы в продолжение дня Утренние молитвы Молитва Оптинских старцев Утренняя, святого Иоанна Кронштадтского Вечерние молитвы Ежедневная молитва святителя Филарета Московского Молитва на каждый час, святителя Иоасафа Белгородского Молитвы об учащихся Перед учением После учения Молитвы о детях Ежедневные молитвы о детях О даровании детей, при бесплодии Во время беременности При недостатке материнского молока Ангелу хранителю о детях Божией Матери о детях Воздыхание матери о своих детях Преподобного Амвросия Оптинского о детях Перед началом обучения дитяти Молитвы разные О даровании молитвы Перед вкушением пищи На благословение пищи и пития мирянами После вкушения пищи Идущего в церковь Перед выходом из дома Перед чтением Евангелия На принятие святой воды и просфоры Ко Господу о путешествующих Перед началом всякого дела По окончании всякого дела О умножении любви и искоренении ненависти и всякой злобы О ненавидящих и обидящих нас Во время бедствия и при нападении врагов Молитва Кресту Господню От осквернения, святого Василия Великого Благодарение за всякое благодеяние Божие Хвалебная песнь святого Амвросия Медиоланского Пророку Божию Илии о защищении от голода После исповедания грехов О прощении забытых грехов Молитва водителя Архангелу Гавриилу Молитвы Ангелам Архангелу Гавриилу Архангелу Рафаилу Архангелу Михаилу Молитвы о благоденствии На освящение всякой вещи Подготовка к Причащению Перед исповедью, преподобного Симеона Нового Богослова Последование ко Святому Причащению Благодарственные молитвы по Святом Причащении Великий пост Молитва святого Ефрема Сирина Пасха Пасхальный канон Часы Святой Пасхи и всей Светлой Седмицы Молитвы об усопших Детей об усопших родителях Родителей за усопших детей Вдовицы за усопшего супруга Вдовца за усопшую супругу За внезапно умершего За всякого усопшего На исход души Молитвы перед иконами Пресвятой Богородицы «Ахтырская» «Благовещение Пресвятой Богородицы» «Благодатное небо» «Боголюбская» «Ватопедская» («Отрада» или «Утешение») «Введение во храм Пресвятой Богородицы» «Взыскание погибших» «Владимирская» «Влахернская» «Воспитание» «Всех скорбящих Радость» «Всецарица» «Грузинская» «Державная» «Донская» «Достойно есть» («Милующая») «Живоносный Источник» «Жировицкая» «Знамение» (Курская-Коренная) «Знамение» (Новгородская) «Иверская» «Иерусалимская» «Избавительница» «Ильинско-Черниговская» «Казанская» «Калужская» «Кипрская» «Козельщанская» «Коневская» «Косинская» (Моденская) «Минская» «Млекопитательница» «Муромская» «Неопалимая Купина» «Нерушимая Стена» «Неувядаемый цвет» «Неупиваемая Чаша» «Нечаянная радость» «Одигитрия» («Смоленская») «Озерянская» «Покров Пресвятой Богородицы» «Попская» «Почаевская» «Прибавление ума» «Призри на смирение» «Рождество Пресвятой Богородицы» «Семистрельная» (Умягчение злых сердец) «Скоропослушница» «Слово плоть бысть» «София — Премудрость Божия» «Спасительница утопающих» «Спорительница хлебов» «Споручница грешных» «Страстная» «Тихвинская» «Толгская» «Трех Радостей» «Троеручица» «Тучная Гора» «Умиление» (Псковско-Печерская) «Умиление» (Серафимо-Дивеевская) «Урюпинская» «Успение» «Утоли моя печали» «Феодоровская» «Целительница» «Ченстоховская» «Черниговская-Гефсиманская» Чирская (Псковская) Экономисса (Домостроительница) «Ярославская» «Яхромская» Молитвы ко святым Святому благоверному великому князю Александру Невскому Преподобному Александру Свирскому Великомученице Анастасии Узорешительнице Святой великомученице Варваре Святым мученицам Вере, Надежде, Любови и матери их Софии Мученику Вонифатию Великомученику Георгию Победоносцу Мученикам и исповедникам Гурию, Самону и Авиву Святой великомученице Екатерине Мученику и чудотворцу Иоанну Воину Святому праведному Иоанну Кронштадтскому Блаженной Матроне Московской Святителю Николаю чудотворцу Святому великомученику и целителю Пантелеимону Благоверным святым Петру и Февронии, Муромским чудотворцам Преподобному Серафиму Саровскому Преподобному Сергию Радонежскому Всем святым, в земле Российской просиявшим Псалтирь Псалом 3 Псалом 6 Псалом 26 Псалом 33 Псалом 34 Псалом 37 Псалом 40 Псалом 50 Псалом 67 Псалом 90 Псалом 102 Псалом 108 Каноны Умилительный ко Господу нашему Иисусу Христу Молебный ко Пресвятой Богородице Покаянный ко Господу нашему Иисусу Христу Ангелу хранителю За болящего Три канона с акафистом Иисусу Сладчайшему Акафисты Святому благоверному князю Александру Невскому Преподобному Александру, Свирскому чудотворцу Святой великомученице Анастасии Узорешительнице Святой благоверной княгине Анне Кашинской Святому Архангелу Михаилу Пресвятой Богородице Всемогущему Богу в нашествии печали Святому равноапостольному великому князю Владимиру Святому великомученику Георгию победоносцу Святым мученикам Гурию, Самону и Авиву Святителю Игнатию Брянчанинову Сладчайшему Господу нашему Иисусу Христу Святому пророку божию Илии Святому праведному Иоанну Кронштадтскому, чудотворцу Преподобным Кириллу и Марии Радонежским Святой блаженной Ксении Петербургской Святителю и исповеднику Луке, архиепископу Крымскому Святой блаженной Матроне Московской Святителю Николаю Чудотворцу Святой равноапостольной великой княгине Ольге Святому великомученику и целителю Пантелеимону Святым Петру и Февронии Муромским Преподобному Серафиму, Вырицкому чудотворцу Преподобному Серафиму, Саровскому чудотворцу Преподобному Сергию Радонежскому Святителю Спиридону Тримифунтскому Святителю Тихону, патриарху Московскому и всея России Святителю Тихону Задонскому Святому мученику Трифону Святителю Феофану, Затворнику Вышенскому Святым мученикам Флору и Лавру Рождеству Христову Воскресению Христову Святым новомученикам и исповедникам Церкви Русской Святым царственным страстотерпцам Всем святым, от века Богу благоугодившим Успению Пресвятой Богородицы Пресвятой Богородице перед иконой «Воспитание» Пресвятой Богородице перед иконой «Всецарица» Пресвятой Богородице перед иконой «Казанская» Пресвятой Богородице перед иконой «Неопалимая Купина» Пресвятой Богородице перед иконой «Неупиваемая Чаша» Пресвятой Богородице перед иконой «Нечаянная Радость» Пресвятой Богородице перед иконой «Умягчение Злых Сердец» Пресвятой Богородице перед иконой «Утоли Моя Печали»

Три канона с акафистом Иисусу Сладчайшему: покаянный ко Господу Иисусу Христу, молебный ко Пресвятой Богородице и Ангелу Хранителю в соединении

Глас 6

Песнь 1

Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную песнь пои́м, вопия́ше.

Господу Иисусу Христу

Припев: Поми́луй мя, Бо́же, поми́луй мя.

Ны́не приступи́х аз, гре́шный и обремене́нный, к Тебе́, Влады́це и Бо́гу моему́; не сме́ю же взира́ти на не́бо, то́кмо молю́ся, глаго́ля: даждь ми, Го́споди, ум, да пла́чуся дел мои́х го́рько.

Припев: Поми́луй мя, Бо́же, поми́луй мя.

О, го́ре мне, гре́шному! Па́че всех челове́к окая́нен есмь, покая́ния несть во мне; даждь ми, Го́споди, сле́зы, да пла́чуся дел мои́х го́рько.

Припев: Поми́луй мя, Бо́же, поми́луй мя.

Безу́мне, окая́нне челове́че, в ле́ности вре́мя губи́ши; помы́сли житие́ твое́, и обрати́ся ко Го́споду Бо́гу, и пла́чися о де́лех твои́х го́рько.

Припев: Пресвята́я Богоро́дице, спаси́ нас.

Ма́ти Бо́жия Пречи́стая, воззри́ на мя, гре́шнаго, и от се́ти диа́воли изба́ви мя, и на путь покая́ния наста́ви мя, да пла́чуся дел мои́х го́рько.

Пресвятой Богородице

Припев: Пресвята́я Богоро́дице, спаси́ нас.

Мно́гими содержи́мь напа́стьми, к Тебе́ прибега́ю, спасе́ния иски́й. О Ма́ти Сло́ва и Де́во, от тя́жких и лю́тых мя спаси́.

Припев: Пресвята́я Богоро́дице, спаси́ нас.

Страсте́й мя смуща́ют прило́зи, мно́гаго уны́ния испо́лнити мою́ ду́шу; умири́, Отрокови́це, тишино́ю Сы́на и Бо́га Твоего́, Всенепоро́чная.

Припев: Пресвята́я Богоро́дице, спаси́ нас.

Спа́са ро́ждшую Тя и Бо́га, молю́, Де́во, изба́витися ми лю́тых: к Тебе́ бо ны́не прибега́я, простира́ю и ду́шу, и помышле́ние.

Припев: Пресвята́я Богоро́дице, спаси́ нас.

Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би, еди́на Богома́ти, я́ко Блага́я, Блага́го же Роди́тельница.

Ангелу хранителю

Припев: Го́споди Иису́се Христе́, Бо́же мой, поми́луй мя.

Песнь воспе́ти и восхвали́ти, Спа́се, Твоего́ раба́ досто́йно сподо́би, безпло́тному А́нгелу, наста́внику и храни́телю моему́.

Припев: Святы́й А́нгеле Бо́жий, храни́телю мой, моли́ Бо́га о мне.

Еди́н аз в неразу́мии и в ле́ности ны́не лежу́, наста́вниче мой и храни́телю, не оста́ви мене́ погиба́юща.

Сла́ва Отцу́, и Сы́ну, и Свято́му Ду́ху. Ум мой твое́ю моли́твою напра́ви, твори́ти ми Бо́жия повеле́ния, да получу́ от Бо́га отда́ние грехо́в, и ненави́дети ми злых наста́ви мя, молю́ся ти.

И ны́не и при́сно, и во ве́ки веко́в. Ами́нь. Моли́ся, Деви́це, о мне, рабе́ Твое́м, ко Благода́телю, со храни́телем мои́м А́нгелом, и наста́ви мя твори́ти за́поведи Сы́на Твоего́ и Творца́ моего́.

Песнь 3

Ирмо́с: Несть свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

Господу Иисусу Христу

Припев: Поми́луй мя, Бо́же, поми́луй мя.

Внегда́ поста́влени бу́дут престо́ли на Cуди́щи Cтра́шнем, тогда́ всех челове́к дела́ облича́тся; го́ре та́мо бу́дет гре́шным, в му́ку отсыла́емым; и то ве́дущи, душе́ моя́, пока́йся от злых дел твои́х.

Припев: Поми́луй мя, Бо́же, поми́луй мя.

Пра́ведницы возра́дуются, а гре́шнии воспла́чутся, тогда́ никто́же возмо́жет помощи́ нам, но дела́ на́ша осу́дят нас; те́мже пре́жде конца́ пока́йся от злых дел твои́х.

Припев: Поми́луй мя, Бо́же, поми́луй мя.

Увы́ мне, великогре́шному, и́же де́лы и мы́сльми оскверни́вся, ни ка́пли слез име́ю от жестосе́рдия; ны́не возни́кни от земли́, душе́ моя́, и пока́йся от злых дел твои́х.

Припев: Пресвята́я Богоро́дице, спаси́ нас.

Се, взыва́ет, Госпоже́, Сын Твой и поуча́ет нас на до́брое, аз же, гре́шный, добра́ всегда́ бе́гаю, но Ты, Ми́лостивая, поми́луй мя, да пока́юся от злых мои́х дел.

Пресвятой Богородице

Припев: Пресвята́я Богоро́дице, спаси́ нас.

Предста́тельство и покро́в жи́зни моея́ полага́ю Тя, Богороди́тельнице Де́во: Ты мя окорми́ ко приста́нищу Твоему́, благи́х вино́вна, ве́рных утвержде́ние, еди́на Всепе́тая.

Припев: Пресвята́я Богоро́дице, спаси́ нас.

Молю́, Де́во, душе́вное смуще́ние и печа́ли моея́ бу́рю разори́ти: Ты бо, Богоневе́стная, Нача́льника тишины́ Христа́ родила́ еси́, еди́на Пречи́стая.

Припев: Пресвята́я Богоро́дице, спаси́ нас.

Благоде́теля ро́ждши до́брых вино́внаго, благодея́ния бога́тство всем источи́, вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

Припев: Пресвята́я Богоро́дице, спаси́ нас.

Лю́тыми неду́ги и боле́зненными страстьми́ истяза́ему, Де́во, Ты ми помози́: исцеле́ний бо неоску́дное Тя зна́ю сокро́вище, Пренепоро́чная, неиждива́емое.

Ангелу хранителю

Припев: Святы́й А́нгеле Бо́жий, храни́телю мой, моли́ Бо́га о мне.

Все помышле́ние мое́ и ду́шу мою́ к тебе́ возложи́х, храни́телю мой, ты от вся́кия мя напа́сти вра́жия изба́ви.

Припев: Святы́й А́нгеле Бо́жий, храни́телю мой, моли́ Бо́га о мне.

Враг попира́ет мя, и озлобля́ет, и поуча́ет всегда́ твори́ти своя́ хоте́ния; но ты, наста́вниче мой, не оста́ви мене́ погиба́юща.

Сла́ва Отцу́, и Сы́ну, и Свято́му Ду́ху. Пе́ти песнь со благодаре́нием и усе́рдием Творцу́ и Бо́гу даждь ми и тебе́, благо́му А́нгелу храни́телю моему́; изба́вителю мой, изми́ мя от враг, озлобля́ющих мя.

И ны́не и при́сно, и во ве́ки веко́в. Ами́нь. Исцели́, Пречи́стая, моя́ многонеду́жныя стру́пы, я́же в души́; прожени́ враги́, и́же при́сно бо́рются со мно́ю.

Го́споди, поми́луй. (Трижды)

Седален, глас 6

Помышля́ю день стра́шный и пла́чуся дея́ний мои́х лука́вых: ка́ко отвеща́ю Безсме́ртному Царю́ или́ ко́им дерзнове́нием воззрю́ на Судию́, блу́дный аз? Благоутро́бный О́тче, Сы́не Единоро́дный и Ду́ше Святы́й, поми́луй мя.

Сла́ва Отцу́, и Сы́ну, и Свято́му Ду́ху.

Седален, глас 2

От любве́ душе́вныя вопию́ ти, храни́телю моея́ души́, всесвяты́й мой А́нгеле: покры́й мя, и соблюди́ от лука́ваго ловле́ния всегда́, и к жи́зни наста́ви небе́сней, вразумля́я, и просвеща́я, и укрепля́я мя.

И ны́не и при́сно, и во ве́ки веко́в. Ами́нь.

Богородичен

Богоро́дице безневе́стная Пречи́стая, Я́же без се́мене ро́ждши всех Влады́ку, Того́ со А́нгелом храни́телем мои́м моли́ изба́вити ми ся вся́каго недоуме́ния и да́ти умиле́ние и све́т души́ мое́й, и согреше́нием очище́ние, Я́же еди́на вско́ре заступа́ющи.

Песнь 4

Ирмо́с: Христо́с моя́ си́ла, Бог и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Господу Иисусу Христу

Припев: Поми́луй мя, Бо́же, поми́луй мя.

Широ́к путь зде и уго́дный сла́сти твори́ти, но го́рько бу́дет в после́дний день, егда́ душа́ от те́ла разлуча́тися бу́дет; блюди́ся от сих, челове́че, Ца́рствия ра́ди Бо́жия.

Припев: Поми́луй мя, Бо́же, поми́луй мя.

Почто́ убо́гаго оби́диши, мзду нае́мничу уде́ржуеши, бра́та твоего́ не лю́биши, блуд и го́рдость го́ниши? Оста́ви у́бо сия́, душе́ моя́, и пока́йся Ца́рствия ра́ди Бо́жия.

Припев: Поми́луй мя, Бо́же, поми́луй мя.

О безу́мный челове́че, доко́ле углеба́еши, я́ко пчела́, собира́ющи бога́тство твое́? Вско́ре бо поги́бнет, я́ко прах и пе́пел: но бо́лее взыщи́ Ца́рствия Бо́жия.

Припев: Пресвята́я Богоро́дице, спаси́ нас.

Госпоже́ Богоро́дице, поми́луй мя, гре́шнаго, и в доброде́тели укрепи́, и соблюди́ мя, да на́глая смерть не похи́тит мя негото́ваго; и доведи́ мя, Де́во, Ца́рствия Бо́жия.

Пресвятой Богородице

Припев: Пресвята́я Богоро́дице, спаси́ нас.

Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Припев: Пресвята́я Богоро́дице, спаси́ нас.

Милосе́рдия Твоего́ бе́здну призыва́ющу пода́ждь ми, Я́же Благосе́рдаго ро́ждшая и Спа́са всех пою́щих Тя.

Припев: Пресвята́я Богоро́дице, спаси́ нас.

Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя Богома́терь.

Припев: Пресвята́я Богоро́дице, спаси́ нас.

На одре́ боле́зни моея́ и не́мощи низлежа́щу ми, я́ко Боголюби́ва, помози́, Богоро́дице, еди́на Присноде́во.

Припев: Пресвята́я Богоро́дице, спаси́ нас.

Наде́жду, и утвержде́ние, и спасе́ния сте́ну недви́жиму иму́ще Тя, Всепе́тая, неудо́бства вся́каго избавля́емся.

Ангелу хранителю

Припев: Святы́й А́нгеле Бо́жий, храни́телю мой, моли́ Бо́га о мне.

Моли́ Человеколю́бца Бо́га ты, храни́телю мой, и не оста́ви мене́, но при́сно в ми́ре житие́ мое́ соблюди́ и пода́ждь ми спасе́ние необори́мое.

Припев: Святы́й А́нгеле Бо́жий, храни́телю мой, моли́ Бо́га о мне.

Я́ко засту́пника и храни́теля животу́ моему́ прие́м тя от Бо́га, А́нгеле, молю́ тя, святы́й, от вся́ких мя бед свободи́.

Сла́ва Отцу́, и Сы́ну, и Свято́му Ду́ху. Мою́ скве́рность твое́ю святы́нею очи́сти, храни́телю мой, и от ча́сти шу́ия да отлуче́н бу́ду моли́твами твои́ми, и прича́стник сла́вы явлю́ся.

И ны́не и при́сно, и во ве́ки веко́в. Ами́нь. Недоуме́ние предлежи́т ми от обыше́дших мя зол, Пречи́стая, но изба́ви мя от них ско́ро: к Тебе́ бо еди́ней прибего́х.

Песнь 5

Ирмо́с: Бо́жиим све́том Твои́м, Бла́же, у́тренюющих Ти ду́ши любо́вию озари́, молю́ся, Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Господу Иисусу Христу

Припев: Поми́луй мя, Бо́же, поми́луй мя.

Воспомяни́, окая́нный челове́че, ка́ко лжам, клевета́м, разбо́ю, не́мощем, лю́тым звере́м грехо́в ра́ди порабоще́н еси́; душе́ моя́ гре́шная, того́ ли восхоте́ла еси́?

Припев: Поми́луй мя, Бо́же, поми́луй мя.

Трепе́щут ми у́ди, все́ми бо сотвори́х вину́: очи́ма взира́яй, уши́ма слы́шай, язы́ком зла́я глаго́ляй, всего́ себе́ гее́нне предая́й; душе́ моя́ гре́шная, сего́ ли восхоте́ла еси́?

Припев: Поми́луй мя, Бо́же, поми́луй мя.

Блудника́ и разбо́йника ка́ющася прия́л еси́, Спа́се, аз же еди́н ле́ностию грехо́вною отягчи́хся и злым дело́м порабо́тихся; душе́ моя́ гре́шная, сего́ ли восхоте́ла еси́?

Припев: Пресвята́я Богоро́дице, спаси́ нас.

Ди́вная и ско́рая Помо́щнице всем челове́ком, Ма́ти Бо́жия, помози́ ми, недосто́йному, душа́ бо моя́ гре́шная того́ восхоте́.

Пресвятой Богородице

Припев: Пресвята́я Богоро́дице, спаси́ нас.

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Припев: Пресвята́я Богоро́дице, спаси́ нас.

Изба́ви нас от бед, Богоро́дице Чи́стая, ве́чное ро́ждши избавле́ние и мир, всяк ум преиму́щий.

Припев: Пресвята́я Богоро́дице, спаси́ нас.

Разреши́ мглу прегреше́ний мои́х, Богоневе́сто, просвеще́нием Твоея́ све́тлости, Свет ро́ждшая Боже́ственный и преве́чный.

Припев: Пресвята́я Богоро́дице, спаси́ нас.

Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми.

Ангелу хранителю

Припев: Святы́й А́нгеле Бо́жий, храни́телю мой, моли́ Бо́га о мне.

Я́ко име́я дерзнове́ние к Бо́гу, храни́телю мой святы́й, Сего́ умоли́ от оскорбля́ющих мя зол изба́вити.

Припев: Святы́й А́нгеле Бо́жий, храни́телю мой, моли́ Бо́га о мне.

Све́те све́тлый, све́тло просвети́ ду́шу мою́, наста́вниче мой и храни́телю, от Бо́га да́нный ми А́нгеле.

Сла́ва Отцу́, и Сы́ну, и Свято́му Ду́ху. Спя́ща мя зле тягото́ю грехо́вною я́ко бдя́ща сохрани́, А́нгеле Бо́жий, и возста́ви мя на славосло́вие моле́нием твои́м.

И ны́не и при́сно, и во ве́ки веко́в. Ами́нь. Мари́е, Госпоже́ Богоро́дице безневе́стная, наде́ждо ве́рных, вра́жия возноше́ния низложи́, пою́щия же Тя возвесели́.

Песнь 6

Ирмо́с: Жите́йское мо́ре воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Господу Иисусу Христу

Припев: Поми́луй мя, Бо́же, поми́луй мя.

Житие́ на земли́ блу́дно пожи́х и ду́шу во тму преда́х, ны́не у́бо молю́ Тя, Ми́лостивый Влады́ко: свободи́ мя от рабо́ты сея́ вра́жия и даждь ми ра́зум твори́ти во́лю Твою́.

Припев: Поми́луй мя, Бо́же, поми́луй мя.

Кто твори́т такова́я, я́коже аз? Я́коже бо свиния́ лежи́т в калу́, та́ко и аз греху́ служу́. Но Ты, Го́споди, исто́ргни мя от гну́са сего́ и даждь ми се́рдце твори́ти за́поведи Твоя́.

Припев: Поми́луй мя, Бо́же, поми́луй мя.

Воспряни́, окая́нный челове́че, к Бо́гу, воспомяну́в своя́ согреше́ния, припа́дая ко Творцу́, слезя́ и стеня́; Той же, я́ко Милосе́рд, даст ти ум зна́ти во́лю Свою́.

Припев: Пресвята́я Богоро́дице, спаси́ нас.

Богоро́дице Де́во, от ви́димаго и неви́димаго зла сохрани́ мя, Пречи́стая, и приими́ моли́твы моя́, и донеси́ я Сы́ну Твоему́, да даст ми ум твори́ти во́лю Его́.

Пресвятой Богородице

Припев: Пресвята́я Богоро́дице, спаси́ нас.

Сме́рти и тли я́ко спасл есть, Сам Ся изда́в сме́рти, тле́нием и сме́ртию мое́ естество́ я́то бы́вшее, Де́во, моли́ Го́спода и Сы́на Твоего́ враго́в злоде́йствия мя изба́вити.

Припев: Пресвята́я Богоро́дице, спаси́ нас.

Предста́тельницу Тя живота́ вем, и Храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли страсте́й мои́х изба́вити мя.

Припев: Пресвята́я Богоро́дице, спаси́ нас.

Я́ко сте́ну прибе́жища стяжа́хом, и душ всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно ра́дуемся. О Влады́чице, и ны́не нас от страсте́й и бед спаси́.

Припев: Пресвята́я Богоро́дице, спаси́ нас.

На одре́ ны́не немощству́яй лежу́, и несть исцеле́ния пло́ти мое́й; но, Бо́га и Спа́са ми́ру и Изба́вителя неду́гов ро́ждшая, Тебе́ молю́ся, Благо́й: от тли неду́г возста́ви мя.

Ангелу хранителю

Припев: Святы́й А́нгеле Бо́жий, храни́телю мой, моли́ Бо́га о мне.

Вся́ких мя напа́стей свободи́ и от печа́лей спаси́, молю́ся ти, святы́й А́нгеле, да́нный ми от Бо́га, храни́телю мой до́брый.

Припев: Святы́й А́нгеле Бо́жий, храни́телю мой, моли́ Бо́га о мне.

Освети́ ум мой, бла́же, и просвети́ мя, молю́ся ти, святы́й А́нгеле, и мы́слити ми поле́зная всегда́ наста́ви мя.

Сла́ва Отцу́, и Сы́ну, и Свято́му Ду́ху. Уста́ви се́рдце мое́ от настоя́щаго мяте́жа, и бде́ти укрепи́ мя во благи́х, храни́телю мой, и наста́ви мя чу́дно к тишине́ живо́тней.

И ны́не и при́сно, и во ве́ки веко́в. Ами́нь. Сло́во Бо́жие в Тя всели́ся, Богоро́дице, и челове́ком Тя показа́ небе́сную ле́ствицу: Тобо́ю бо к нам Вы́шний соше́л есть.

Го́споди, поми́луй. (Трижды)

Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Акафист Сладчайшему Господу нашему Иисусу Христу

Накануне субботы вместо акафиста Иисусу Сладчайшему читается акафист Пресвятой Богородице.

Кондак 1

Возбра́нный Воево́до и Го́споди, а́да Победи́телю, я́ко изба́влься от ве́чныя сме́рти, похва́льная воспису́ю Ти, созда́ние и раб Твой; но я́ко име́яй милосе́рдие неизрече́нное, от вся́ких мя бед свободи́, зову́ща: Иису́се, Сы́не Бо́жий, поми́луй мя.

Икос 1

А́нгелов Тво́рче и Го́споди Сил, отве́рзи ми недоуме́нный ум и язы́к на похвалу́ пречи́стаго Твоего́ и́мене, я́коже глухо́му и гугни́вому дре́вле слух и язы́к отве́рзл еси́, и глаго́лаше зовы́й такова́я:

Иису́се пречу́дный, А́нгелов удивле́ние; Иису́се преси́льный, прароди́телей избавле́ние. Иису́се пресла́дкий, патриа́рхов велича́ние; Иису́се пресла́вный, царе́й укрепле́ние. Иису́се прелюби́мый, проро́ков исполне́ние; Иису́се преди́вный, му́чеников кре́посте. Иису́се прети́хий, мона́хов ра́досте; Иису́се преми́лостивый, пресви́теров сла́досте. Иису́се премилосе́рдый, по́стников воздержа́ние; Иису́се пресла́достный, преподо́бных ра́дование. Иису́се пречестны́й, де́вственных целому́дрие; Иису́се предве́чный, гре́шников спасе́ние. Иису́се, Сы́не Бо́жий, поми́луй мя.

Кондак 2

Ви́дя вдови́цу зе́льне пла́чущу, Го́споди, я́коже тогда́ умилосе́рдився, сы́на ея́, на погребе́ние несо́ма, воскреси́л еси́; си́це и о мне умилосе́рдися, Человеколю́бче, и грехми́ умерщвле́нную мою́ ду́шу воскреси́, зову́щую: Аллилу́иа.

Икос 2

Ра́зум неуразуме́нный разуме́ти Фили́пп ища́, Го́споди, покажи́ нам Отца́, глаго́лаше; Ты же к нему́: толи́кое вре́мя сый со Мно́ю, не позна́л ли еси́, я́ко Оте́ц во Мне, и Аз во Отце́ есмь? Те́мже, Неизсле́дованне, со стра́хом зову́ Ти:

Иису́се, Бо́же предве́чный; Иису́се, Царю́ преси́льный. Иису́се, Влады́ко долготерпели́вый; Иису́се, Спа́се преми́лостивый. Иису́се, Храни́телю мой преблаги́й; Иису́се, очи́сти грехи́ моя́. Иису́се, отыми́ беззако́ния моя́; Иису́се, отпусти́ непра́вды моя́. Иису́се, наде́ждо моя́, не оста́ви мене́; Иису́се, Помо́щниче мой, не отри́ни мене́. Иису́се, Созда́телю мой, не забу́ди мене́; Иису́се, Па́стырю мой, не погуби́ мене́. Иису́се, Сы́не Бо́жий, поми́луй мя.

Кондак 3

Си́лою свы́ше апо́столы облеки́й, Иису́се, во Иерусали́ме седя́щия, облецы́ и мене́, обнаже́ннаго от вся́каго благотворе́ния, теплото́ю Ду́ха Свята́го Твоего́ и даждь ми с любо́вию пе́ти Тебе́: Аллилу́иа.

Икос 3

Име́яй бога́тство милосе́рдия, мытари́, и гре́шники, и неве́рныя призва́л еси́, Иису́се; не пре́зри и мене́ ны́не, подо́бнаго им, но, я́ко многоце́нное ми́ро, приими́ песнь сию́:

Иису́се, си́ло непобеди́мая; Иису́се, ми́лосте безконе́чная. Иису́се, красото́ пресве́тлая; Иису́се, любы́ неизрече́нная. Иису́се, Сы́не Бо́га Жива́го; Иису́се, поми́луй мя, гре́шнаго. Иису́се, услы́ши мя, в беззако́ниих зача́таго; Иису́се, очи́сти мя, во гресе́х рожде́ннаго. Иису́се, научи́ мя, непотре́бнаго; Иису́се, освети́ мя, те́мнаго. Иису́се, очи́сти мя, скве́рнаго; Иису́се, возведи́ мя, блу́днаго. Иису́се, Сы́не Бо́жий, поми́луй мя.

Кондак 4

Бу́рю внутрь име́яй помышле́ний сумни́тельных, Петр утопа́ше; узре́в же во пло́ти Тя су́ща, Иису́се, и по вода́м ходя́ща, позна́ Тя Бо́га и́стиннаго и, ру́ку спасе́ния получи́в, рече́: Аллилу́иа.

Икос 4

Слы́ша слепы́й мимоходя́ща Тя, Го́споди, путе́м, вопия́ше: Иису́се, Сы́не Дави́дов, поми́луй мя! И призва́в, отве́рзл еси́ о́чи его́. Просвети́ у́бо ми́лостию Твое́ю о́чи мы́сленныя се́рдца и мене́, вопию́ща Ти и глаго́люща:

Иису́се, вы́шних Созда́телю; Иису́се, ни́жних Искупи́телю. Иису́се, преиспо́дних Потреби́телю; Иису́се, всея́ тва́ри Украси́телю. Иису́се, души́ моея́ Уте́шителю; Иису́се, ума́ моего́ Просвети́телю. Иису́се, се́рдца моего́ весе́лие; Иису́се, те́ла моего́ здра́вие. Иису́се, Спа́се мой, спаси́ мя; Иису́се, Све́те мой, просвети́ мя. Иису́се, му́ки вся́кия изба́ви мя; Иису́се, спаси́ мя, недосто́йнаго. Иису́се, Сы́не Бо́жий, поми́луй мя.

Кондак 5

Богото́чною Кро́вию я́коже искупи́л еси́ нас дре́вле от зако́нныя кля́твы, Иису́се, си́це изми́ нас от се́ти, е́юже змий запя́т ны страстьми́ плотски́ми, и блу́дным наважде́нием, и злым уны́нием, вопию́щия Ти: Аллилу́иа.

Икос 5

Ви́девше о́троцы евре́йстии во о́бразе челове́честем Созда́вшаго руко́ю челове́ка, и Влады́ку разуме́вше Его́, потща́шася ве́твьми угоди́ти Ему́, оса́нна вопию́ще. Мы же песнь прино́сим Ти, глаго́люще:

Иису́се, Бо́же и́стинный; Иису́се, Сы́не Дави́дов. Иису́се, Царю́ пресла́вный; Иису́се, А́гнче непоро́чный. Иису́се, Па́стырю преди́вный; Иису́се, Храни́телю во мла́дости мое́й. Иису́се, Корми́телю во ю́ности мое́й; Иису́се, похвало́ в ста́рости мое́й. Иису́се, наде́ждо в сме́рти мое́й; Иису́се, животе́ по сме́рти мое́й. Иису́се, утеше́ние мое́ на Суде́ Твое́м; Иису́се, жела́ние мое́, не посрами́ мене́ тогда́. Иису́се, Сы́не Бо́жий, поми́луй мя.

Кондак 6

Пропове́дник богоно́сных веща́ние и глаго́лы исполня́я, Иису́се, на земли́ я́влься, и с челове́ки, Невмести́мый, пожи́л еси́, и боле́зни на́ша подъя́л еси́, отню́дуже ра́нами Твои́ми мы исцеле́вше, пе́ти навыко́хом: Аллилу́иа.

Икос 6

Возсия́ вселе́нней просвеще́ние и́стины Твоея́, и отгна́ся лесть бесо́вская: и́доли бо, Спа́се наш, не терпя́ще Твоея́ кре́пости, падо́ша. Мы же, спасе́ние получи́вше, вопие́м Ти:

Иису́се, и́стино, лесть отгоня́щая; Иису́се, Све́те, превы́шший всех све́тлостей. Иису́се, Царю́, премога́яй всех кре́пости; Иису́се, Бо́же, пребыва́яй в ми́лости. Иису́се, Хле́бе живо́тный, насы́ти мя, а́лчущаго; Иису́се, исто́чниче ра́зума, напо́й мя, жа́ждущаго. Иису́се, оде́ждо весе́лия, оде́й мя, тле́ннаго; Иису́се, покро́ве ра́дости, покры́й мя, недосто́йнаго. Иису́се, Пода́телю прося́щим, даждь ми плач за грехи́ моя́; Иису́се, обре́тение и́щущим, обря́щи ду́шу мою́. Иису́се, Отве́рзителю толку́щим, отве́рзи се́рдце мое́ окая́нное; Иису́се, Искупи́телю гре́шных, очи́сти беззако́ния моя́. Иису́се, Сы́не Бо́жий, поми́луй мя.

Кондак 7

Хотя́ сокрове́нную та́йну от ве́ка откры́ти, я́ко овча́, на заколе́ние веде́н был еси́, Иису́се, и я́ко а́гнец пря́мо стригу́щаго его́, безгла́сен, и я́ко Бог из ме́ртвых воскре́сл еси́, и со сла́вою на Небеса́ возне́слся еси́, и нас совоздви́гл еси́, зову́щих: Аллилу́иа.

Икос 7

Ди́вную показа́ тварь, явле́йся Творе́ц нам: без се́мене от Де́вы воплоти́ся; из гро́ба, печа́ти не руши́в, воскре́се и ко апо́столом, две́рем затворе́нным, с пло́тию вни́де. Те́мже чудя́щеся, воспои́м:

Иису́се, Сло́ве необыме́нный; Иису́се, Сло́ве несогляда́емый. Иису́се, си́ло непостижи́мая; Иису́се, му́дросте недомы́слимая. Иису́се, Божество́ неопи́санное; Иису́се, госпо́дство неисче́тное. Иису́се, ца́рство непобеди́мое; Иису́се, влады́чество безконе́чное. Иису́се, кре́посте высоча́йшая; Иису́се, вла́сте ве́чная. Иису́се, Тво́рче мой, уще́дри мя; Иису́се, Спа́се мой, спаси́ мя. Иису́се, Сы́не Бо́жий, поми́луй мя.

Кондак 8

Стра́нно Бо́га вочелове́чшася ви́дяще, устрани́мся су́етнаго ми́ра и ум на Боже́ственная возложи́м. Сего́ бо ра́ди Бог на зе́млю сни́де, да нас на Небеса́ возведе́т, вопию́щих Ему́: Аллилу́иа.

Икос 8

Весь бе в ни́жних, и вы́шних ника́коже отступи́, Неисче́тный, егда́ во́лею нас ра́ди пострада́, и сме́ртию Свое́ю на́шу смерть умертви́, и воскресе́нием живо́т дарова́ пою́щим:

Иису́се, сла́досте серде́чная; Иису́се, кре́посте теле́сная. Иису́се, све́тлосте душе́вная; Иису́се, быстрото́ у́мная. Иису́се, ра́досте со́вестная; Иису́се, наде́ждо изве́стная. Иису́се, па́мяте предве́чная; Иису́се, похвало́ высо́кая. Иису́се, сла́во моя́ превознесе́нная; Иису́се, жела́ние мое́, не отри́ни мене́. Иису́се, Па́стырю мой, взыщи́ мене́; Иису́се, Спа́се мой, спаси́ мене́. Иису́се, Сы́не Бо́жий, поми́луй мя.

Кондак 9

Все естество́ А́нгельское безпреста́ни сла́вит пресвято́е и́мя Твое́, Иису́се, на Небеси́, Свят, Свят, Свят вопию́ще; мы же, гре́шнии, на земли́ бре́нными устна́ми вопие́м: Аллилу́иа.

Икос 9

Вити́я многовеща́нныя я́коже ры́бы безгла́сныя ви́дим о Тебе́, Иису́се, Спа́се наш: недоуме́ют бо глаго́лати, ка́ко Бог непрело́жный и Челове́к соверше́нный пребыва́еши? Мы же, та́инству дивя́щеся, вопие́м ве́рно:

Иису́се, Бо́же предве́чный; Иису́се, Царю́ ца́рствующих. Иису́се, Влады́ко владе́ющих; Иису́се, Судие́ живы́х и ме́ртвых. Иису́се, наде́ждо ненаде́жных; Иису́се, утеше́ние пла́чущих. Иису́се, сла́во ни́щих; Иису́се, не осуди́ мя по дело́м мои́м. Иису́се, очи́сти мя по ми́лости Твое́й; Иису́се, отжени́ от мене́ уны́ние. Иису́се, просвети́ моя́ мы́сли серде́чныя. Иису́се, даждь ми па́мять сме́ртную. Иису́се, Сы́не Бо́жий, поми́луй мя.

Кондак 10

Спасти́ хотя́ мир, Восто́че восто́ком, к те́мному за́паду, естеству́ на́шему, прише́д, смири́лся еси́ до сме́рти; те́мже превознесе́ся и́мя Твое́ па́че вся́каго и́мене, и от всех коле́н небе́сных и земны́х слы́шиши: Аллилу́иа.

Икос 10

Царю́ Преве́чный, Уте́шителю, Христе́ и́стинный, очи́сти ны от вся́кия скве́рны, я́коже очи́стил еси́ де́сять прокаже́нных, и исцели́ ны, я́коже исцели́л еси́ сребролюби́вую ду́шу Закхе́а мытаря́, да вопие́м Ти, во умиле́нии зову́ще:

Иису́се, Сокро́вище нетле́нное; Иису́се, бога́тство неистощи́мое. Иису́се, пи́ще кре́пкая; Иису́се, питие́ неисчерпа́емое. Иису́се, ни́щих одея́ние; Иису́се, вдов заступле́ние. Иису́се, си́рых Защи́тниче; Иису́се, тружда́ющихся по́моще. Иису́се, стра́нных Наста́вниче; Иису́се, пла́вающих Ко́рмчий. Иису́се, бу́рных оти́шие; Иису́се Бо́же, воздви́гни мя, па́дшаго. Иису́се, Сы́не Бо́жий, поми́луй мя.

Кондак 11

Пе́ние всеумиле́нное приношу́ Ти недосто́йный, вопию́ Ти, я́ко ханане́а: Иису́се, поми́луй мя; не дщерь бо, но плоть и́мам, страстьми́ лю́те беся́щуюся и я́ростию пали́мую, и исцеле́ние даждь вопию́щу Ти: Аллилу́иа.

Икос 11

Светопода́тельна свети́льника су́щим во тме неразу́мия, пре́жде гоня́й Тя Па́вел, богоразу́мнаго гла́са си́лу внуши́ и душе́вную быстроту́ уясни́; си́це и мене́ те́мныя зе́ницы душе́вныя просвети́, зову́ща:

Иису́се, Царю́ мой прекре́пкий; Иису́се, Бо́же мой преси́льный. Иису́се, Го́споди мой пребезсме́ртный; Иису́се, Созда́телю мой пресла́вный. Иису́се, Наста́вниче мой предо́брый; Иису́се, Па́стырю мой преще́дрый. Иису́се, Влады́ко мой преми́лостивый; Иису́се, Спа́се мой премилосе́рдый. Иису́се, просвети́ моя́ чу́вствия, потемне́нная страстьми́; Иису́се, исцели́ мое́ те́ло, острупле́нное грехми́. Иису́се, очи́сти мой ум от по́мыслов су́етных; Иису́се, сохрани́ се́рдце мое́ от по́хотей лука́вых. Иису́се, Сы́не Бо́жий, поми́луй мя.

Кондак 12

Благода́ть пода́ждь ми, всех долго́в Реши́телю, Иису́се, и приими́ мя, ка́ющася, я́коже прия́л еси́ Петра́, отве́ргшагося Тебе́, и призови́ мя уныва́ющаго, я́коже дре́вле Па́вла, гоня́ща Тя, и услы́ши мя, вопию́ща Ти: Аллилу́иа.

Икос 12

Пою́ще Твое́ вочелове́чение, восхваля́ем Тя вси и ве́руем со Фомо́ю, я́ко Госпо́дь и Бог еси́, седя́й со Отце́м и хотя́й суди́ти живы́м и ме́ртвым. Тогда́ у́бо сподо́би мя десна́го стоя́ния, вопию́щаго:

Иису́се, Царю́ предве́чный, поми́луй мя; Иису́се, цве́те благово́нный, облагоуха́й мя. Иису́се, теплото́ люби́мая, огре́й мя; Иису́се, хра́ме предве́чный, покры́й мя. Иису́се, оде́ждо све́тлая, украси́ мя; Иису́се, би́сере честны́й, осия́й мя. Иису́се, ка́меню драги́й, просвети́ мя; Иису́се, Со́лнце пра́вды, освети́ мя. Иису́се, Све́те святы́й, облиста́й мя; Иису́се, боле́зни душе́вныя и теле́сныя изба́ви мя. Иису́се, из руки́ сопроти́вныя изми́ мя; Иису́се, огня́ негаси́маго и про́чих ве́чных мук свободи́ мя. Иису́се, Сы́не Бо́жий, поми́луй мя.

Кондак 13

О пресла́дкий и всеще́дрый Иису́се! Приими́ ны́не ма́лое моле́ние сие́ на́ше, я́коже прия́л еси́ вдови́цы две ле́пте, и сохрани́ достоя́ние Твое́ от враг ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и смертоно́сныя ра́ны, и гряду́щия изми́ му́ки всех вопию́щих Ти: Аллилу́иа. (Кондак читается трижды).

Икос 1

А́нгелов Тво́рче и Го́споди Сил, отве́рзи ми недоуме́нный ум и язы́к на похвалу́ пречи́стаго Твоего́ и́мене, я́коже глухо́му и гугни́вому дре́вле слух и язы́к отве́рзл еси́, и глаго́лаше зовы́й такова́я:

Иису́се пречу́дный, А́нгелов удивле́ние; Иису́се преси́льный, прароди́телей избавле́ние. Иису́се пресла́дкий, патриа́рхов велича́ние; Иису́се пресла́вный, царе́й укрепле́ние. Иису́се прелюби́мый, проро́ков исполне́ние; Иису́се преди́вный, му́чеников кре́посте. Иису́се прети́хий, мона́хов ра́досте; Иису́се преми́лостивый, пресви́теров сла́досте. Иису́се премилосе́рдый, по́стников воздержа́ние; Иису́се пресла́достный, преподо́бных ра́дование. Иису́се пречестны́й, де́вственных целому́дрие; Иису́се предве́чный, гре́шников спасе́ние. Иису́се, Сы́не Бо́жий, поми́луй мя.

Кондак 1

Возбра́нный Воево́до и Го́споди, а́да Победи́телю, я́ко изба́влься от ве́чныя сме́рти, похва́льная воспису́ю Ти, созда́ние и раб Твой; но я́ко име́яй милосе́рдие неизрече́нное, от вся́ких мя бед свободи́, зову́ща: Иису́се, Сы́не Бо́жий, поми́луй мя.

Песнь 7

Ирмо́с: Росода́тельну у́бо пещь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Господу Иисусу Христу

Припев: Поми́луй мя, Бо́же, поми́луй мя.

Не наде́йся, душе́ моя́, на тле́нное бога́тство и на непра́ведное собра́ние, вся бо сия́ не ве́си кому́ оста́виши, но возопи́й: поми́луй мя, Христе́ Бо́же, недосто́йнаго.

Припев: Поми́луй мя, Бо́же, поми́луй мя.

Не упова́й, душе́ моя́, на теле́сное здра́вие и на скоромимоходя́щую красоту́, ви́диши бо, я́ко си́льнии и млади́и умира́ют; но возопи́й: поми́луй мя, Христе́ Бо́же, недосто́йнаго.

Припев: Поми́луй мя, Бо́же, поми́луй мя.

Воспомяни́, душе́ моя́, ве́чное житие́, Ца́рство Небе́сное, угото́ванное святы́м, и тму кроме́шную, и гнев Бо́жий злым, и возопи́й: поми́луй мя, Христе́ Бо́же, недосто́йнаго.

Припев: Пресвята́я Богоро́дице, спаси́ нас.

Припади́, душе́ моя́, к Бо́жией Ма́тери и помоли́ся Той, есть бо ско́рая Помо́щница ка́ющимся: умо́лит Сы́на, Христа́ Бо́га, и поми́лует мя, недосто́йнаго.

Пресвятой Богородице

Припев: Пресвята́я Богоро́дице, спаси́ нас.

На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́; оте́ц на́ших Бо́же, благослове́н еси́.

Припев: Пресвята́я Богоро́дице, спаси́ нас.

Воли́теля ми́лости, Его́же родила́ еси́, Ма́ти чи́стая, умоли́ изба́витися от прегреше́ний и душе́вных скверн ве́рою зову́щим: оте́ц на́ших Бо́же, благослове́н еси́.

Припев: Пресвята́я Богоро́дице, спаси́ нас.

Сокро́вище спасе́ния и исто́чник нетле́ния Тя Ро́ждшую, и столп утвержде́ния, и дверь покая́ния зову́щим показа́л еси́: оте́ц на́ших Бо́же, благослове́н еси́.

Припев: Пресвята́я Богоро́дице, спаси́ нас.

Теле́сныя сла́бости и душе́вныя неду́ги, Богороди́тельнице, любо́вию приступа́ющих к кро́ву Твоему́, Де́во, исцели́ти сподо́би, Спа́са Христа́ нам ро́ждшая.

Ангелу хранителю

Припев: Святы́й А́нгеле Бо́жий, храни́телю мой, моли́ Бо́га о мне.

Ми́лостив бу́ди ми и умоли́ Бо́га, Госпо́день А́нгеле, име́ю бо тя засту́пника во всем животе́ мое́м, наста́вника же и храни́теля, от Бо́га дарова́ннаго ми во ве́ки.

Припев: Святы́й А́нгеле Бо́жий, храни́телю мой, моли́ Бо́га о мне.

Не оста́ви в путь ше́ствующия души́ моея́ окая́нныя уби́ти разбо́йником, святы́й А́нгеле, я́же ти от Бо́га предана́ бысть непоро́чне; но наста́ви ю́ на путь покая́ния.

Сла́ва Отцу́, и Сы́ну, и Свято́му Ду́ху. Всю посра́млену ду́шу мою́ привожду́ от лука́вых ми по́мысл и дел; но предвари́, наста́вниче мой, и исцеле́ние ми пода́ждь благи́х по́мысл, уклоня́ти ми ся всегда́ на пра́выя стези́.

И ны́не и при́сно, и во ве́ки веко́в. Ами́нь. Прему́дрости испо́лни всех и кре́пости Боже́ственныя, Ипоста́сная Прему́дросте Вы́шняго, Богоро́дицы ра́ди, ве́рою вопию́щих: оте́ц на́ших Бо́же, благослове́н еси́.

Песнь 8

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся бо твори́ши, Христе́, то́кмо е́же хоте́ти. Тя превозно́сим во вся ве́ки.

Господу Иисусу Христу

Припев: Поми́луй мя, Бо́же, поми́луй мя.

Ка́ко не и́мам пла́катися, егда́ помышля́ю смерть, ви́дех бо во гро́бе лежа́ща бра́та моего́, безсла́вна и безобра́зна? Что у́бо ча́ю и на что наде́юся? То́кмо даждь ми, Го́споди, пре́жде конца́ покая́ние. (Дважды)

Припев: Поми́луй мя, Бо́же, поми́луй мя.

Ве́рую, я́ко прии́деши суди́ти живы́х и ме́ртвых, и вси во свое́м чи́ну ста́нут, ста́рии и млади́и, влады́ки и кня́зи, де́вы и свяще́нницы; где обря́щуся аз? Сего́ ра́ди вопию́: даждь ми, Го́споди, пре́жде конца́ покая́ние.

Припев: Пресвята́я Богоро́дице, спаси́ нас.

Пречи́стая Богоро́дице, приими́ недосто́йную моли́тву мою́, и сохрани́ мя от на́глыя сме́рти, и да́руй ми пре́жде конца́ покая́ние.

Пресвятой Богородице

Припев: Пресвята́я Богоро́дице, спаси́ нас.

По́мощи я́же от Тебе́ тре́бующия не пре́зри, Де́во, пою́щия и превознося́щия Тя во ве́ки.

Припев: Пресвята́я Богоро́дице, спаси́ нас.

Неможе́ние души́ моея́ исцеля́еши и теле́сныя боле́зни, Де́во, да Тя просла́влю, Чи́стая, во ве́ки.

Припев: Пресвята́я Богоро́дице, спаси́ нас.

Исцеле́ний бога́тство излива́еши ве́рно пою́щим Тя, Де́во, и превознося́щим неизрече́нное Твое́ рождество́.

Припев: Пресвята́я Богоро́дице, спаси́ нас.

Напа́стей Ты прило́ги отгоня́еши и страсте́й нахо́ды, Де́во; те́мже Тя пое́м во вся ве́ки.

Ангелу хранителю

Припев: Святы́й А́нгеле Бо́жий, храни́телю мой, моли́ Бо́га о мне.

От Бо́га по́сланный, утверди́ живо́т мой, раба́ твоего́, преблаги́й А́нгеле, и не оста́ви мене́ во ве́ки.

Припев: Святы́й А́нгеле Бо́жий, храни́телю мой, моли́ Бо́га о мне.

А́нгела тя су́ща бла́га, души́ моея́ наста́вника и храни́теля, преблаже́нне, воспева́ю во ве́ки.

Сла́ва Отцу́, и Сы́ну, и Свято́му Ду́ху. Бу́ди ми покро́в и забра́ло в день испыта́ния всех челове́к, в о́ньже огне́м искуша́ются дела́ блага́я же и зла́я.

И ны́не и при́сно, и во ве́ки веко́в. Ами́нь. Бу́ди ми Помо́щница и тишина́, Богоро́дице Присноде́во, рабу́ Твоему́, и не оста́ви мене́ лише́на бы́ти Твоего́ влады́чества.

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с Небе́сными во́и Тя ублажа́ем.

Господу Иисусу Христу

Припев: Поми́луй мя, Бо́же, поми́луй мя.

Ны́не к вам прибега́ю, А́нгели, Арха́нгели и вся Небе́сныя Си́лы, у Престо́ла Бо́жия стоя́щии, моли́теся ко Творцу́ своему́, да изба́вит ду́шу мою́ от му́ки ве́чныя.

Припев: Поми́луй мя, Бо́же, поми́луй мя.

Ны́не пла́чуся к вам, святи́и патриа́рси, ца́рие и проро́цы, апо́столи и святи́телие и вси избра́ннии Христо́вы: помози́те ми на Суде́, да спасе́т ду́шу мою́ от си́лы вра́жия.

Припев: Поми́луй мя, Бо́же, поми́луй мя.

Ны́не к вам воздежу́ ру́це, святи́и му́ченицы, пусты́нницы, де́вственницы, пра́ведницы и вси святи́и, моля́щиися ко Го́споду за весь мир, да поми́лует мя в час сме́рти моея́.

Припев: Пресвята́я Богоро́дице, спаси́ нас.

Ма́ти Бо́жия, помози́ ми, на Тя си́льне наде́ющемуся, умоли́ Сы́на Своего́, да поста́вит мя, недосто́йнаго, одесну́ю Себе́, егда́ ся́дет судя́й живы́х и ме́ртвых. Ами́нь.

Пресвятой Богородице

Припев: Пресвята́я Богоро́дице, спаси́ нас.

То́ка слез мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.

Припев: Пресвята́я Богоро́дице, спаси́ нас.

Ра́дости мое́ се́рдце испо́лни, Де́во, Я́же ра́дости прие́мшая исполне́ние, грехо́вную печа́ль потребля́ющи.

Припев: Пресвята́я Богоро́дице, спаси́ нас.

Приста́нище и предста́тельство к Тебе́ прибега́ющих бу́ди, Де́во, и стена́ неруши́мая, прибе́жище же, и покро́в, и весе́лие.

Припев: Пресвята́я Богоро́дице, спаси́ нас.

Све́та Твоего́ заря́ми просвети́, Де́во, мрак неве́дения отгоня́ющи, благове́рно Богоро́дицу Тя испове́дающих.

Припев: Пресвята́я Богоро́дице, спаси́ нас.

На ме́сте озлобле́ния не́мощи смири́вшагося, Де́во, исцели́, из нездра́вия во здра́вие претворя́ющи.

Ангелу хранителю

Припев: Го́споди Иису́се Христе́, Бо́же мой, поми́луй мя.

Поми́луй мя, еди́не Спа́се мой, я́ко ми́лостив еси́ и милосе́рд, и пра́ведных лико́в сотвори́ мя прича́стника.

Припев: Святы́й А́нгеле Бо́жий, храни́телю мой, моли́ Бо́га о мне.

Мы́слити ми при́сно и твори́ти, Госпо́день А́нгеле, блага́я и поле́зная да́руй, я́ко си́льна яви́ в не́мощи и непоро́чна.

Сла́ва Отцу́, и Сы́ну, и Свято́му Ду́ху. Я́ко име́я дерзнове́ние к Царю́ Небе́сному, Того́ моли́ с про́чими безпло́тными, поми́ловати мя, окая́ннаго.

И ны́не и при́сно, и во ве́ки веко́в. Ами́нь. Мно́го дерзнове́ние иму́щи, Де́во, к Вопло́щшемуся из Тебе́, преложи́ мя от уз, и разреше́ние ми пода́ждь и спасе́ние моли́твами Твои́ми.

Молитва ко Господу нашему Иисусу Христу

Го́споди Иису́се Христе́, Бо́же мой, поми́луй мя, гре́шнаго.

Влады́ко Христе́ Бо́же, И́же Страстьми́ Свои́ми стра́сти моя́ исцели́вый и я́звами Свои́ми я́звы моя́ уврачева́вый, да́руй мне, мно́го Тебе́ прегреши́вшему, сле́зы умиле́ния; сраствори́ моему́ те́лу от обоня́ния Животворя́щаго Те́ла Твоего́ и наслади́ ду́шу мою́ Твое́ю Честно́ю Кро́вию от го́рести, е́юже мя сопроти́вник напои́; возвы́си мой ум к Тебе́, до́лу пони́кший, и возведи́ от про́пасти поги́бели: я́ко не и́мам покая́ния, не и́мам умиле́ния, не и́мам сле́зы уте́шительныя, возводя́щия ча́да ко своему́ насле́дию. Омрачи́хся умо́м в жите́йских страсте́х, не могу́ воззре́ти к Тебе́ в боле́зни, не могу́ согре́тися слеза́ми я́же к Тебе́ любве́. Но, Влады́ко Го́споди Иису́се Христе́, Сокро́вище благи́х, да́руй мне покая́ние всеце́лое и се́рдце люботру́дное во взыска́ние Твое́, да́руй мне благода́ть Твою́ и обнови́ во мне зра́ки Твоего́ о́браза. Оста́вих Тя, не оста́ви мене́; изы́ди на взыска́ние мое́, возведи́ к па́жити Твое́й и сопричти́ мя овца́м избра́ннаго Твоего́ ста́да, воспита́й мя с ни́ми от зла́ка Боже́ственных Твои́х Та́инств, моли́твами Пречи́стыя Твоея́ Ма́тере и всех святы́х Твои́х. Ами́нь.

Молитва ко Пресвятой Богородице

Пресвята́я Богоро́дице, спаси́ нас.

Цари́це моя́ преблага́я, наде́ждо моя́, Богоро́дице, прия́телище си́рых и стра́нных Предста́тельнице, скорбя́щих ра́досте, оби́димых Покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стра́нна. Оби́ду мою́ ве́си, разреши́ ту́, я́ко во́лиши: я́ко не и́мам ины́я по́мощи, ра́зве Тебе́, ни ины́я предста́тельницы, ни благи́я уте́шительницы, то́кмо Тебе́, о Богома́ти, я́ко да сохрани́ши мя и покры́еши во ве́ки веко́в. Ами́нь.

Молитва Ангелу хранителю

Святы́й А́нгеле Бо́жий, храни́телю мой, моли́ Бо́га о мне.

А́нгеле Христо́в святы́й, к тебе́ припа́дая молю́ся, храни́телю мой святы́й, прида́нный ми на соблюде́ние души́ и те́лу моему́ гре́шному от свята́го креще́ния. Аз же свое́ю ле́ностию и свои́м злым обы́чаем прогне́вах твою́ пречи́стую све́тлость и отгна́х тя от себе́ все́ми сту́дными де́лы: лжа́ми, клевета́ми, за́вистию, осужде́нием, презо́рством, непоко́рством, братоненавиде́нием и злопомне́нием, сребролю́бием, прелюбодея́нием, я́ростию, ску́постию, объяде́нием без сы́тости и опи́вством, многоглаго́ланием, злы́ми по́мыслы и лука́выми, го́рдым обы́чаем и блу́дным возбеше́нием, имы́й самохоте́ние на вся́кое плотско́е вожделе́ние. О зло́е мое́ произволе́ние, его́же и ско́ти безслове́снии не творя́т! Да ка́ко возмо́жеши воззре́ти на мя или́ приступи́ти ко мне, а́ки ко псу смердя́щему? Кото́рыма очи́ма, А́нгеле Христо́в, воззри́ши на мя, опле́тшася зле во гну́сных де́лех? Да ка́ко уже́ возмогу́ отпуще́ния проси́ти го́рьким, и злым мои́м, и лука́вым дея́нием, в ня́же впа́даю по вся дни и но́щи и на всяк час? Но молю́ся ти, припа́дая, храни́телю мой святы́й, умилосе́рдися на мя, гре́шнаго и недосто́йнаго раба́ твоего́ (имя), бу́ди ми помо́щник и засту́пник на зла́го моего́ сопроти́вника святы́ми твои́ми моли́твами и Ца́рствия Бо́жия прича́стника мя сотвори́ со все́ми святы́ми, всегда́, и ны́не и при́сно, и во ве́ки веко́в. Ами́нь.

Окончание

Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Го́споди, поми́луй. (Трижды)

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Го́споди, поми́луй. (Трижды)